കോഴിക്കോട് : പ്ലസ്ടു കോഴ ആരോപണവുമായി ബന്ധപ്പെട്ട് മുസ്ലിം ലീഗ് എംഎല്എ കെ.എം. ഷാജിയെ എന്ഫോഴ്സ്മെന്റ് ഡയറ്കടറേറ്റ് ചോദ്യം ചെയ്യുന്നു. അഴീക്കോട് സ്കൂളിന് പ്ലസ്ടു അനുവദിക്കാനായി 25 ലക്ഷം രൂപ കോഴ വാങ്ങിയെന്നതാണ് കേസ്. കോഴിക്കോട് എന്ഫോഴ്സ്മെന്റ് ഓഫീസിലാണ് ചോദ്യം ചെയ്യല്.
കെഎം ഷാജിയുടെ ഭാര്യ ആശയുടെയും ലീഗ് നേതാവും മുന് പിഎസ്സി അംഗവുമായ ടി.ടി. ഇസ്മായിലിന്റേയും മൊഴി കഴിഞ്ഞ ദിവസം രേഖപ്പെടുത്തിയിരുന്നു. അതിന് പിന്നാലെയാണ് കെ.എം. ഷാജിയേയും വിളിപ്പിച്ചിരിക്കുന്നത്. കെഎം ഷാജിയുടെ ഭാര്യ ആശയെ ഇഡി തിങ്കളാഴ്ച ആറുമണിക്കൂറോളം ചോദ്യം ചെയ്തിരുന്നു.
ഷാജിയും ടിടി ഇസ്മായിലും മറ്റൊരു ലീഗ് നേതാവും ചേര്ന്നായിരുന്നു മാലൂര്കുന്നില് ഭൂമി വാങ്ങിയത്. പിന്നീടിത് ഷാജി സ്വന്തമാക്കുകയും ഭാര്യ ആശയുടെ പേരിലേക്ക് മാറ്റുകയുമായിരുന്നു. ഭൂമി ഇടപാടുമായി ബന്ധപ്പെട്ട് താന് നേരത്തെ നല്കിയ മൊഴിയില് വ്യക്തത തേടാനാണ് എന്ഫോഴ്സ്മെന്റ് തന്നെ വിളിപ്പിച്ചതെന്ന് ടി.ടി. ഇസ്മയില് പറഞ്ഞു.
അതിനിടെ വരവില് കവിഞ്ഞ സ്വത്ത് സമ്പാദിച്ചെന്ന പരാതിയില് അഴീക്കോട് എംഎല്എയും മുസ്ലീം ലീഗ് നേതാവുമായ കെ എം ഷാജിക്കെതിരെ വിജിലന്സ് അന്വേഷണത്തിനും ഉത്തരവുണ്ട്. കോഴിക്കോട് വിജിലന്സ് ജഡ്ജി കെ.വി.ജയകുമാര് ആണ് ഉത്തരവ് പുറപ്പെടുവിച്ചത്. കോഴിക്കോട് വിജിലന്സ് എസ്പിക്കാണ് അന്വേഷണച്ചുമതല. അഭിഭാഷകനായ എം.ആര് ഹരീഷ് നല്കിയ പരാതിയിലാണ് ഉത്തരവ്.
