കുടയത്തൂര്: കോളപ്രയില് നിന്ന് ചാലപ്പുറം ഭാഗത്തേക്കുള്ള പഞ്ചായത്ത് റോഡില് വീതി കുറവ് കാരണം ഗതാഗതം ദുഷ്കരമാകുന്നു. ഇതിനിടയില് സ്വകാര്യ വ്യക്തികള് റോഡ് കൈയേറുന്നതായി പരാതി.
വീതി കുറവുള്ള റോഡില് ഒരു വശത്തേക്ക് മാത്രമേ ഒരു സമയം ഗതാഗതം സാധ്യമാകൂ. റോഡ് കൈയേറുന്നതിനാല് ഉള്ള വീതി ഇല്ലാതെയാകുകയാണ്. ചക്കളത്തുകാവ് ക്ഷേത്രത്തില് നിന്നുള്ള റോഡും കോളപ്രയില് നിന്നുള്ള റോഡും വാഴയില് ഭാഗത്ത് കൂട്ടിമുട്ടി ചലപ്പുറം ഭാഗത്തേക്കുള്ള ഒറ്റ റോഡായിട്ടാണ് നിര്മ്മാണം നടത്തിയിട്ടുള്ളത്.
ഇതില് കോളപ്ര ഭാഗത്ത് നിന്ന് വാഴയില് ഭാഗം വരെയുള്ള റോഡിലാണ് കൈയേറ്റം നടക്കുന്നത്.
സ്വകാര്യ വ്യക്തികള് കൃഷിയും കൈയ്യാലയും റോഡിലേക്ക് ഇറക്കി വെക്കുന്നതിനാല് വാഹനങ്ങള്ക്ക് കടന്നു പോകുവാന് സാധിക്കുന്നില്ല. നൂറോളം കുടുബങ്ങള് ഉപയോഗിക്കുന്ന റോഡാണിത്. വാഹനങ്ങള്ക്ക് തടസമായ കൈയേറ്റങ്ങള് ഒഴിപ്പിക്കണമെന്ന് നാട്ടുകാര് ആവശ്യപ്പെട്ടു.
