കോഴിക്കോട്: ഹിന്ദുസമൂഹത്തിനും മതസ്വാതന്ത്ര്യം അനുവദിക്കണമെന്ന് കേരള സമസ്ത വിശ്വകര്‍മ്മ സംഘം സംസ്ഥാന ജനറല്‍ സെക്രട്ടറി എം.പി. അനൂപ് കുമാര്‍ പറഞ്ഞു. മാവൂര്‍ റോഡ് ഹിന്ദുശ്മശാന സംരക്ഷണ പ്രക്ഷോഭത്തിന്റെ ഭാഗമായുള്ള പതിനഞ്ചാം ദിവസത്തെ സായാഹ്ന പ്രതിഷേധം ഉദ്ഘാടനം ചെയ്യുകയായിരുന്നു അദ്ദേഹം.
കൊറോണ ബാധിച്ചു മരിച്ചവരുടെ മൃതദേഹം സംസ്‌ക്കരിക്കുവാന്‍ ന്യൂനപക്ഷ വിഭാഗങ്ങള്‍ക്ക് മതാചാരപരമായി മൃതദേഹ പരിപാലനത്തിന് സ്വാതന്ത്ര്യം അനുവദിക്കുന്ന ഇടത് ‘ഭരണക്കാര്‍ തന്നെയാണ് ഹിന്ദു സമൂഹത്തിന് സ്വാതന്ത്ര്യം നിഷേധിക്കുന്നതെന്നും അദ്ദേഹം കൂട്ടിച്ചേര്‍ത്തു. ഹിന്ദു ഐക്യവേദി കോര്‍പ്പറേഷന്‍ കമ്മറ്റി ട്രഷറര്‍ കെ. അജിത് കുമാര്‍ അദ്ധ്യക്ഷനായി. ജില്ലാ സെക്രട്ടറി സുനില്‍കുമാര്‍ പുത്തൂര്‍മഠം മുഖ്യപ്രഭാഷണം നടത്തി. കേരള സമസ്ത വിശ്വകര്‍മ്മ സംഘം സംസ്ഥാന വൈസ് പ്രസിഡണ്ട് ബാബു താമരശ്ശേരി, എം.സി. ഷാജി, വിനോദ് കരുവിശ്ശേരി എന്നിവര്‍ സംസാരിച്ചു.
ഇന്ന് സായാഹ്ന പ്രതിഷേധത്തിന്റെ സമാപന ദിവസ സമരം എന്‍എസ്എസ് കോഴിക്കോട് താലൂക്ക് യൂണിയന്‍ പ്രസിഡണ്ട് അഡ്വ. അജിത് കുമാര്‍ ഉദ്ഘാടനം ചെയ്യും ഹിന്ദുഐക്യവേദി ചാലപ്പുറം മേഖല കമ്മറ്റി നേതൃത്വം നല്‍കും.
