പാറ്റ്ന: മഹാരാഷ്ട്ര മുന് മുഖ്യമന്ത്രിയും ബി.ജെ.പി. നേതാവുമായ ദേവേന്ദ്ര ഫഡ്നാവിസിന് കോവിഡ് രോഗം സ്ഥിരീകരിച്ചു. ബിഹാര് തിരഞ്ഞെടുപ്പ് ചുമതലയുള്ള ഫഡ്നാവിസ് ബിഹാറിലാണിപ്പോള് ഉള്ളത്. ട്വിറ്ററിലൂടെയാണ് തനിക്ക് കോവിഡ് സ്ഥിരീകരിച്ച കാര്യം അദ്ദേഹം അറിയിച്ചത്. ലോക്ഡൗണ് ആരംഭിച്ചത് മുതല് എല്ലാ ദിവസവും താന് ജോലിയിലായിരുന്നുവെന്നും എന്നാല് ഇപ്പോള് കുറച്ചു ദിവസം അതില് നിന്ന് വിട്ട് നില്ക്കാന് ദൈവം ആഗ്രഹിക്കുന്നതായാണ് തോന്നുന്നതെന്നും അദ്ദേഹം ട്വീറ്റ് ചെയ്തു. ഡോക്ടര്മാരുടെ നിര്ദേശപ്രകാരം ചികിത്സ തേടിയിട്ടുണ്ടെന്നും ഫഡ്നാവിസ് കുറിച്ചു.
താനുമായി സമ്പര്ക്കത്തില് വന്നവര് ഉടന് പരിശോധന നടത്തണമെന്നും എല്ലാവരും ശ്രദ്ധിക്കണമെന്നും അദ്ദേഹം മറ്റൊരു ട്വീറ്റില് ആവശ്യപ്പെട്ടിട്ടുണ്ട്. കഴിഞ്ഞ ദിവസം ബിഹാര് ഉപമുഖ്യമന്ത്രിയും ബി.ജെ.പി. നേതാവുമായ സുശീല് കുമാര് മോദിക്കും കോവിഡ്-19 സ്ഥിരീകരിച്ചിരുന്നു.
