കാച്ചി: സെക്ടറല് മജിസ്ട്രേറ്റുമാരുടെ മിന്നല് പരിശോധനകളില് ജില്ലയില് 454 കേസുകള് രജിസ്റ്റര് ചെയ്തു. കൊറോണ മാനദണ്ഡങ്ങള് പാലിക്കാത്തതിനും നിരോധനാജ്ഞ ലംഘനങ്ങള്ക്കുമാണ് കേസുകള്. സെക്ടറല് മജിസ്ട്രേറ്റുമാരുടെ നേതൃത്വത്തിലുള്ള കൊറോണ നിയന്ത്രണ പ്രവര്ത്തനങ്ങളും ജില്ലയില് ഊര്ജ്ജിതമായി.
119 സെക്ടറല് മജിസ്ട്രേറ്റുമാരെയാണ് നിരീക്ഷണത്തിനായി ജില്ലയില് നിയോഗിച്ചത്. പൊതു സ്ഥലങ്ങളിലും കച്ചവട സ്ഥാപനങ്ങളും കേന്ദ്രീകരിച്ചാണ് സെക്ടറല് മജിസ്ട്രേറ്റുമാര് നിരീക്ഷണം ശക്തമാക്കിയത്. നിയമവിരുദ്ധമായി കൂട്ടം കൂടിയതിന് 19 കേസുകള് രജിസ്റ്റര് ചെയ്തു. കച്ചവട സ്ഥാപനങ്ങളില് കൊറോണ മാനദണ്ഡങ്ങള് കൃത്യമായി പാലിക്കാത്ത 11 കേസുകളും കണ്ടെത്തി. വ്യാപാര കേന്ദ്രങ്ങളില് സാമൂഹിക അകലം പാലിക്കാത്തതിന് 41 കേസുകളും ആവശ്യമായ സോപ്പും സാനിറ്റൈസറും ലഭ്യമാക്കാത്തതിന് 12 കേസുകളും റിപ്പോര്ട്ട് ചെയ്തു.
സന്ദര്ശകരുടെ വിവരങ്ങള് സൂക്ഷിക്കാത്തതിന് 161 കടകള്ക്കെതിരെയും നടപടിയെടുത്തു. മാസ്ക് കൃത്യമായ രീതിയില് ഉപയോഗിക്കാത്തതിന് 205 കേസുകളും സെക്ഷന് 144 ലംഘനവുമായി ബന്ധപ്പെട്ട് രണ്ട് കേസുകളും ക്വാറന്റീന് ലംഘനം ശ്രദ്ധയില് പെട്ടതിനെ തുടര്ന്ന് ഒരു കേസും ജില്ലയില് രജിസ്റ്റര് ചെയ്തു. ഒരു ദിവസം 40 നടുത്ത് പരിശോധനകളാണ് മജിസ്ട്രേറ്റുമാര് നടത്തുന്നത്. പൊതു സ്ഥലങ്ങള് കൂടാതെ തങ്ങളുടെ പരിധിയില് പെട്ട പ്രദേശങ്ങളില് നടക്കുന്ന വിവാഹ ചടങ്ങുകള്, മരണാനന്തര ചടങ്ങുകള്, ആളുകള് കൂടുന്ന ഇടങ്ങള് എന്നിവിടങ്ങളിലും പരിശോധന നടത്തും. ഇവരുടെ നിര്ദ്ദേശത്തെ തുടര്ന്ന് സ്റ്റേഷന് ഹൗസ് ഓഫീസര് മാരാണ് നടപടി സ്വീകരിക്കുന്നത്. ജില്ലാ കളക്ടറുടെ നിയന്ത്രണത്തില് ജില്ലാ ദുരന്തനിവാരണ അതോറിറ്റിയുടെ ഉദ്യോഗസ്ഥരായാണ് സെക്ടറല് മജിസ്ട്രേറ്റുമാര് പ്രവര്ത്തിക്കുന്നത്.
