തിരുവനന്തപുരം: സ്വര്‍ണ്ണക്കടത്ത് കേസിലെ മുഖ്യപ്രതിയായ സ്വപ്ന സുരേഷിനെതിരെ കോഫെപോസ ചുമത്തി. കസ്റ്റംസിന്റെ പ്രിവെന്റീവ് വിഭാഗത്തിന്റെ അപേക്ഷയെ തുടര്‍ന്ന് ഒരു വര്‍ഷത്തെ കരുതല്‍ തടങ്കലിന് ഹൈക്കോടതി ജഡ്ജിമാരടങ്ങിയ സമിതി ഉത്തരവിറക്കി. ഈ വാറണ്ട് ജയില്‍ അധികൃതര്‍ക്ക് കൈമാറാനുള്ള നടപടികള്‍ വൈകാതെ കസ്റ്റംസ് സ്വീകരിക്കും.
സ്വര്‍ണക്കടത്തുമായി ബന്ധപ്പെട്ട് കസ്റ്റംസ് രജിസ്റ്റര്‍ ചെയ്ത കേസില്‍ സ്വപ്ന സുരേഷിന് ജാമ്യം ലഭിച്ചിരുന്നു. എന്നാല്‍ ഇ.ഡി. രജിസ്റ്റര്‍ ചെയ്ത കേസിലും എന്‍.ഐ.എ. രജിസ്റ്റര്‍ ചെയ്ത കേസിലും സ്വപ്നയ്‌ക്ക് ജാമ്യം ലഭിച്ചിട്ടില്ല. അവര്‍ ഇപ്പോഴും ജുഡിഷ്യല്‍ കസ്റ്റഡിയില്‍ തുടരുകയാണ്.
സ്ഥിരമായി സാമ്പത്തിക കുറ്റകൃത്യത്തില്‍ ഏര്‍പ്പെടുന്നവര്‍, രാജ്യത്തിന്റെ സാമ്പത്തിക സുരക്ഷയെ ബാധിക്കുന്നത് എന്നിവരെ അതില്‍ നിന്നും വിലക്കുന്നതിന്റെ ഭാഗമായി ഒരുവര്‍ഷം കരുതല്‍ തടങ്കലില്‍ വെയ്‌ക്കുന്ന നിയമമാണ് കോഫെപോസ. ഹൈക്കോടതി ജഡ്ജിമാരടങ്ങിയ കോഫെപോസ സമിതിയാണ് ഈ നിയമപ്രകാരം തടവിലാക്കാനുള്ള അനുമതി നല്‍കേണ്ടത് .
കസ്റ്റംസ്, ദേശിയ അന്വേഷണ ഏജന്‍സി, എന്‍ഫോഴ്സ്മെന്റ് എന്നീ മൂന്നു വിഭാഗമാണ് ഇവര്‍ക്കെതിരെ കേസ് രജിസ്റ്റര്‍ ചെയ്തിരിക്കുന്നത്.കഴിഞ്ഞ ദിവസം കൊച്ചിയില്‍ നടന്ന സംയുക്ത അന്വേഷണ സംഘത്തിന്റെ മീറ്റിംഗിന് ശേഷമാണ് ഇത്തരമൊരു നടപടിയെടുക്കാനുള്ള സുപ്രധാനമായ തീരുമാനം ഉണ്ടായിരിക്കുന്നത്.
