തിരുവനന്തപുരം : കൊറോണ വൈറസ് രോഗബാധിതനായി മരിച്ച വ്യക്തിയുടെ മൃതദേഹത്തിന് പകരം അജ്ഞാതന്റേത് നല്‍കിയതായി പരാതി. തിരുവനന്തപുരം മെഡിക്കല്‍ കോളേജ് അധികൃതര്‍ക്കെതിരെയാണ് പരാതി ഉയര്‍ന്നിരിക്കുന്നത്.
കൊറോണ ബാധിച്ച് ചികിത്സയിലിരിക്കെ മരിച്ച വെണ്ണിയൂര്‍ സ്വദേശി ദേവരാജന്റെ മൃതദേഹത്തിന് പകരം അജ്ഞാതന്റെ മൃതദേഹം നല്‍കിതായാണ് ആരോണം. ഇതിനെതിരെ ബന്ധുക്കള്‍ പരാതി നല്‍കിയതോടെയാണ് സംഭവം പുറത്തുവരുന്നത്. തുടര്‍ന്ന് ആശുപത്രി അധികൃതര്‍ നല്‍കിയ പരിശോധനയില്‍ മൃതദേഹം മാറിപ്പോയതായി വ്യക്തമാകുകയായിരുന്നു.
സംഭവത്തില്‍ ആശുപത്രി അധികൃതര്‍ അന്വേഷണം തുടങ്ങി. പ്രിന്‍സിപ്പലിന്റെ നിര്‍ദേശാനുസരണം ആര്‍എംഒ ആണ് അന്വേഷണം നടത്തുന്നത്. മൃതദേഹം കൈമാറിയ മോര്‍ച്ചറി ജീവനക്കാര്‍ക്ക് വീഴ്‌ച്ച പറ്റിയോ എന്നാണ് അന്വേഷണം. ഇതിനിടെ ദേവരാജന്റെ മൃതദേഹം കൈപ്പറ്റി അധികൃതര്‍ സംസ്‌കരിക്കുകയും ചെയ്തു. അതേസമയം സംസ്‌കരിക്കുന്നതിന് തൊട്ടുമുന്‍പ് ദേവരാജന്റെ മകന്‍ മൃതദേഹം തിരിച്ചറിഞ്ഞിരുന്നുവെന്ന് വിഴിഞ്ഞം പോലീസ് അറിയിച്ചു.
