ന്യൂദല്‍ഹി : പുല്‍വാമ ഭീകരാക്രമണത്തിനായി ഭീകരര്‍ക്ക് പണം കൈമാറിയത് പാക്കിസ്ഥാനി ബാങ്ക് അക്കൗണ്ടുകള്‍ വഴി. പുല്‍വാമ ഭീകരാക്രമണക്കേസില്‍ ദേശീയ അന്വേഷണ സമിതി സമര്‍പ്പിച്ച കുറ്റപത്രത്തിലാണ് ഇക്കാര്യം അറിയിച്ചിരിക്കുന്നത്.
പുല്‍വാമ ഭീകരാക്രമണത്തിന്റെ മുഖ്യ ആസൂത്രകന്‍ ഉമര്‍ ഫറൂഖിന്റെ അക്കൗണ്ടിലേക്ക് 10 ലക്ഷം രൂപ കൈമാറിയിട്ടുണ്ട്. ഫാറൂഖിന്റെ പാക്കിസ്ഥാനി അക്കൗണ്ടിലേക്കാണ് പണം എത്തിയത്. എന്‍ഐഎ കോടതിയില്‍ നല്‍കിയ കുറ്റപത്രത്തില്‍ ഉമര്‍ ഫറൂഖിന്റെ ബാങ്ക് രേഖകളും ഹാജരാക്കിയതായാണ് റിപ്പോര്‍ട്ടുകള്‍.
കൊടും ഭീകരനും ജെയ്‌ഷെ മുഹമ്മദ് സ്ഥാപകനുമായ മൗലാന മസൂദ് അസറിന്റെ മരുമകനാണ് ഉമര്‍ ഫാറൂഖ്. കഴിഞ്ഞ ചൊവ്വാഴ്ചയാണ് പുല്‍വാമ ഭീകരാക്രമണത്തിന്റെ കുറ്റപത്രം ദേശീയ അന്വേഷണ ഏജന്‍സി ജമ്മു-കശ്മീര്‍ കോടതിയില്‍ സമര്‍പ്പിച്ചത്.
