മൂന്നാര്: കാട്ടാന ആക്രമണത്തില് കെഡിഎച്ച്പി കമ്പനിയുടെ ജീവനക്കാരന് മരിച്ചു. വനംവകുപ്പ് മൂന്നാര് ഡിവിഷനിലുള്ള ദേവികുളം റേഞ്ചിന് കീഴിലെ കെഡിഎച്ച്പിയുടെ ചെണ്ടുവാര ഫാക്ടറിയ്ക്ക് സമീപം ആണ് അപകടം.
ചെണ്ടുവര ലയത്തില് താമസിക്കുന്ന പഴനിസ്വാമി(52) ആണ് മരിച്ചത്. ചൊവ്വാഴ്ച വൈകിട്ട് 6 മണിയോടെയാണ് സംഭവം. സമീപത്തെ വീട്ടില് പോയ ശേഷം വീട്ടിലേക്ക് മടങ്ങുന്നതിനിടെ ഒറ്റയാന്റെ മുന്നില്പ്പെടുകയാണെന്നാണ് ലഭിക്കുന്ന വിവരം. യൂക്കാലി പ്ലാന്റേഷനിലേക്ക് ട്രാക്ടറുകള് പോകുന്ന വഴിയാണിത്. മഴയായതിനാല് നല്ല ഇരുട്ടായിരുന്നു മേഖലയിലെന്ന് വനംവകുപ്പ് പറഞ്ഞു.
ആനയുടെ അലര്ച്ച കേട്ടാണ് സംഭവം പുറത്തറിയുന്നത്. താഴെ നിന്ന് ആളുകളെത്തിയപ്പോള് ആന സ്ഥലത്ത് നിന്ന് കുറച്ച് മാറി നിന്നു. തുമ്പികൈക്ക് ഇയാളെ അടിച്ചശേഷം നിലത്ത് വലിച്ചിഴച്ചതായാണ് സ്ഥലത്ത് നിന്ന് ലഭിക്കുന്ന വിവരം. വനം വകുപ്പ് സംഘം ആനയെ പിന്നീട് വനത്തിലേക്ക് വിരട്ടിയോടിച്ചു. ബുധനാഴ്ച പുലര്ച്ചെ രണ്ട് മണിയോടെ മൂന്നാര് പോലീസ് സ്ഥലത്തെത്തി, മൃതദേഹം അടിമാലി താലൂക്ക് ആശുപത്രിയിലേക്ക് മാറ്റി. പോസ്റ്റുമോര്ട്ടത്തിന് ശേഷം മൃതദേഹം ബന്ധുക്കള്ക്ക് കൈമാറി.
