അഹമ്മദാബാദ് : ഗുജറാത്തിലെ അഹമ്മദാബാദിലെ കോവിഡ് ആശുപത്രിയില്‍ തീപിടുത്തമുണ്ടായി എട്ട് പേര്‍ മരിച്ചു. വ്യാഴാഴ്ച രാവിലെയാണ് നവരംഗ്പുരയിലെ സ്വകാര്യ ആശുപത്രിയില്‍ തീപിടുത്തമുണ്ടായത്.
മരിച്ചവരില്‍ അഞ്ച് പേര്‍ പുരുഷന്മാരും മൂന്ന് പേര്‍ സ്ത്രീകളുമാണ്. ഐസിയുവില്‍ പ്രവേശിപ്പിച്ച രോഗികളാണ് മരിച്ചതെന്ന് വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്തു.
ഇന്ന് പുലര്‍ച്ചെ 3.30 ഓടെയാണ് ആശുപത്രിയിലെ ഐസിയു യൂണിറ്റില്‍ തീപിടിത്തം ഉണ്ടായത്. തുടര്‍ന്ന് 40ഓളം രോഗികളെ ഇവിടെ നിന്ന് സിവിക് ആശുപത്രിയിലേക്ക് മാറ്റി. രോഗികളുടെ കുടുംബാംഗങ്ങളും ഫയര്‍ഫോഴ്സ് ഉദ്യോഗസ്ഥരും ചേര്‍ന്നാണ് രക്ഷാപ്രവര്‍ത്തനത്തിന് നേതൃത്വം നല്‍കിയത്. മണിക്കൂറുകള്‍ നീണ്ട പരിശ്രമത്തിന് ശേഷമാണ് തീയണയ്‌ക്കാനായത്. ഇവിടെ അമ്പതോളം കൊറോണ രോഗികള്‍ ഉണ്ടായിരുന്നതായാണ് റിപ്പോര്‍ട്ടുകളില്‍ പറയുന്നത്.
ആശുപത്രിയിലെ അപകടത്തില്‍ മരിച്ചവര്‍ക്ക് പ്രധാനമന്ത്രി നരന്ദ്ര മോദി അനുശോചനം രേഖപ്പെടുത്തി. സംഭവത്തില്‍ അന്വേഷണം നടത്തുമെന്ന് അധികൃതര്‍ അറിയിച്ചു.
