തൊടുപുഴ: കൈതക്കോട് മണ്തിട്ടയിടിഞ്ഞ് രണ്ട് വീടുകള് അപകടാവസ്ഥയില്. നഗരസഭ ആറാം വാര്ഡില്പ്പെട്ട സ്ഥലമാണിത്. മാറാട്ടികുന്നേല് ഷഹനാസ് ഇസ്മെയില്, പടത്തിനാട്ടില് സഫിയ നാസര് എന്നിവരുടെ വീടിന് പിന്നിലാണ് 15 അടിയിലധികം ഉയരമുള്ള തിട്ടയിടിയുന്നത്.
ഞായാറാഴ്ച രാത്രി ഏഴ് മണിയോടെയാണ് മണ് തിട്ടയിടിയാന് ആരംഭിച്ചത്. വീടുകള്ക്ക് നിലവില് കാര്യമായ നാശമില്ലെങ്കിലും എപ്പോള് വേണമെങ്കിലും വലിയ അപകടത്തിന് ഇവിടെ സാധ്യതയുണ്ട്. തിട്ടയുടെ മുകളില് റബര് തോട്ടമാണ്, വരും ദിവസങ്ങളില് മഴ ശക്തമാകുമെന്ന അറിയിപ്പ് നിലവിലുണ്ട്. ഇവിടെ വീണ്ടും മണ്ണിടിയാന് സാധ്യതയുള്ളതിനാല് രണ്ട് വീട്ടുകാരും ബന്ധുവീടുകളിലേക്ക് താമസം മാറിയിരിക്കുകയാണ്.
