കൊല്ലവര്ഷം 1147 ഇടവം 13 ന് മൂവാറ്റുപുഴ മാറാടി ഗ്രാമത്തില് വാളാനിക്കാട്ട് കുടുംബത്തില് ജ്യോതിഷിയും വിഷവൈദ്യനുമായിരുന്ന നീലകണ്ഠപിള്ളയുടേയും കല്യാണി അമ്മയുടേയും മകനായി ശ്രീ നീലകണ്ഠതീര്ത്ഥപാദസ്വാമികള് ജനിച്ചു. ഔപചാരിക വിദ്യാഭ്യാസത്തിന് ശേഷം അധ്യാപകനായി. ജോലി രാജിവെച്ച ശേഷം ചട്ടമ്പിസ്വാമികളുടെ ശിഷ്യനായി.
ശ്രീനാരായണഗുരു, അയ്യങ്കാളി മന്നത്ത് പത്മനാഭന് തുടങ്ങിയവരുമായി അടുത്ത ബന്ധം പുലര്ത്തിയിരുന്ന സ്വാമികള് ഉത്തര ഭാരതത്തിലെ അനേകം സ്ഥലങ്ങള് സന്ദര്ശിക്കുകയും അവയെക്കുറിച്ച് ഗ്രന്ഥങ്ങള് രചിക്കുകയും ചെയ്തു. ചട്ടമ്പിസ്വാമിയുടെ നിര്ദ്ദേശ പ്രകാരം നായര് സമുദായത്തിലെ ആചാരങ്ങള് ക്രോഡീകരിക്കുന്നതിനായി ‘ആചാരപദ്ധതി’ രചിച്ചു.
വിവിധ വിഷയങ്ങളെ ആസ്പദമാക്കി 42 ഓളം ഗ്രന്ഥങ്ങളും അനേകം ലേഖനങ്ങളും, ഉപന്യാസം, സഞ്ചാരസാഹിത്യവുമെല്ലാം സ്വാമികള് രചിച്ചിട്ടുണ്ട്.
ഇവയില് പല ഗ്രന്ഥങ്ങളും ജര്മ്മനി, ഇംഗ്ലണ്ട്, ഫ്രാന്സ്, അമേരിക്ക എന്നീ രാജ്യങ്ങളില് പാഠ്യവിഷയങ്ങളാണ്. കൊല്ല വര്ഷം 1096 (1921) ല് 49 വയസുള്ളപ്പോള് താഴത്തോട്ട് മഠത്തില് വെച്ച് സ്വാമികള് സമാധിയായി. തുടര്ന്ന് ഗുരുവായ ചട്ടമ്പിസ്വാമികള് ശിഷ്യനെ സമാധി ഇരുത്തി, അവിടെ ശിവലിംഗം പ്രതിഷ്ഠ നടത്തി. ശിഷ്യനെ ഗുരു സമാധി ഇരുത്തി എന്ന അപൂര്വതയുള്ള ഇവിടം ഇപ്പോള് ശ്രീ നീലകണ്ഠതീര്ത്ഥ പാദാശ്രമം ആയി അറിയപ്പെടുന്നു.
സമാധി സ്ഥാനമായ കരുനാഗപ്പള്ളി പുതിയകാവ് ശ്രീനീലകണ്ഠ തീര്ത്ഥ പാദാശ്രമത്തില് ഇന്ന് പ്രത്യേക പൂജകളും അഷ്ടാഭിഷേകവും നടക്കും.
രവികുമാര് ചേരിയില്
