കൊച്ചി: സ്വന്തം കുട്ടികള്ക്കു മുന്നില് നഗ്നത പ്രദര്ശനം നടത്തിയ സിപിഎം ആക്ടിവിസ്റ്റ് രഹ്നാ ഫാത്തിമയുടെ മുന്കൂര് ജാമ്യാപേക്ഷ ഹൈക്കോടതി തള്ളി. പ്രായപൂര്ത്തിയാകാത്ത കുട്ടികള്ക്ക് മുന്നില് നഗ്നതാ പ്രദര്ശനം നടത്തിയെന്ന കേസിലാണ് രഹ്ന മുന്കൂര് ജാമ്യത്തിനായി കോടതിയെ സമീപിച്ചിരുന്നത്. എന്നാല് ഇത് കോടതി തള്ളുകയായിരുന്നു. ഇതേത്തുടര്ന്ന് കേസില് രഹ്നനയെ പോലീസ് ഉടന് അറസ്റ്റ് ചെയ്യും. ജാമ്യമില്ലാ വകുപ്പുകള് ചേര്ത്താണ് പോലീസ് കേസ് എടുത്തിരിക്കുന്നത്. തിരുവല്ല പോലീസ് ആണ് രഹ്നാ ഫാത്തിമയ്ക്കെതിരെ കേസ്സെടുത്തത്.
കുട്ടികളെകൊണ്ട് രഹ്നാഫാത്തിമ തന്റെ നഗ്നതയില് ചിത്രം വരപ്പിക്കുന്ന വീഡിയോ യുട്യൂബ് വഴി പ്രചരിപ്പിച്ചു എന്നാണ് പരാതി. ഇതിന്റെ കൃത്യമായ തെളിവുകളും പരാതിക്കാരന് പോലീസിനു കൈമാറിയിട്ടുണ്ട്. ഇതേ തുടര്ന്നാണ് ജാമ്യമില്ലാ വകുപ്പ് പ്രകാരം പോലീസ് കേസ് എടുത്തിരിക്കുന്നത്. കുട്ടികള്ക്കു മുന്നില് മനപൂര്വം നഗ്നത പ്രദര്ശിപ്പിക്കുകയും അതു സോഷ്യല് മീഡിയയില് പ്രചരിപ്പിക്കുകയും ചെയ്ത രഹ്ന ഫാത്തിമയ്ക്ക് ജാമ്യം നല്കരുതെന്ന് സംസ്ഥാന സര്ക്കാരും കോടതിയെ അറിയിച്ചിരുന്നു. ഹൈക്കോടതിയിലെ കേസ് പരിഗണിക്കുമ്പോഴാണ് സര്ക്കാര് ഇക്കാര്യം കോടതിയെ അറിയിച്ചത്. കലയെന്ന പേരില് കുട്ടികളെ ഇത്തരം പ്രവൃത്തികള്ക്ക് ഉപയോഗിക്കരുത്. സ്വന്തം മക്കളെ വെച്ച് എന്തും ചെയ്യാമെന്ന നില വരരുത്. സമൂഹത്തില് അത് ഗുരുതര പ്രത്യാഘാതങ്ങള് ഉണ്ടാക്കും. രഹ്നയുടെ ഫാത്തിമയുടെ മുന്കാല ചെയ്തികള് കണക്കിലെടുക്കണമെന്നും സര്ക്കാര് കോടതിയില് വ്യക്തമാക്കി.
മക്കളെകൊണ്ട് നഗ്ന മദഹത്ത് ചിത്രം വരപ്പിച്ചത് അമ്പത്തിയൊന്നായിരം പേരാണ് കണ്ടത്. ഇത് പോക്സോ പരിധിയില് വരുമെന്നും സര്ക്കാര് വ്യക്തമാക്കി. രണ്ട് ആഴ്ച മുന്പാണ് രഹ്ന ഫാത്തിമ മുന്കൂര് ജാമ്യാപേക്ഷ സമര്പ്പിച്ചത്. തനിക്കെതിരായ പോക്സോ കേസ് നിലനില്ക്കില്ലെന്നും പരാതിക്കു പിന്നില് മത, രാഷ്ട്രീയ വൈരാഗ്യമാണെന്നും ചൂണ്ടിക്കാണിച്ചാണ് ഹര്ജി നല്കിയത്.
