കേരളീയ വാസ്തുവിദ്യയെ പ്രതിനിധാനം ചെയ്യുന്നവയില് പ്രധാനങ്ങളായ ദാരുശില്പകലയും നാലുകെട്ട് നിര്മ്മാണ രീതിയും ലോക പ്രസിദ്ധങ്ങളാണ്. ലോകത്തില് മറ്റെല്ലാ ഇടങ്ങളിലും ഇത്തരം നിര്മാണ ശൈലി കണ്ടിട്ടുണ്ടെങ്കിലും കേരളീയ ശൈലി വ്യത്യസ്തവും സമാനതയില്ലാത്തതുമാകുന്നു.
ചൈനയിലെ സിഹിയുവാന്, പുരാതന റോമിലെ വില്ല റസ്റ്റിക്ക, തമിഴ്നാട്ടിലെ ചെട്ടിയാര് വീടുകള്, ചില ഗോത്രജനവിഭാഗങ്ങളുടെ കുടികള് എന്നിവ നാലുകെട്ട് നിര്മാണ രീതിയോട് വളരെ ചേര്ന്നു നില്ക്കുന്നവയാണെങ്കിലും നിര്മ്മാണത്തിന്റെ പൂര്ണാവസ്ഥ പ്രാപിച്ച പരിഷ്കൃത രൂപമാണ് കേരളീയ നാലുകെട്ടുകള്.
ഗൃഹവാസ്തുപുരുഷ സങ്കല്പത്തിന്റെ ബ്രഹ്മസ്ഥാനത്തു താഴ്ന്നു കിടക്കുന്ന നടുമുറ്റവും അതിനു ചുറ്റുമുള്ള വരാന്തകളും അതിനോടു ചേര്ന്നു നില്ക്കുന്ന തെക്കിനി, പടിഞ്ഞാറ്റിനി, വടക്കിനി, കിഴക്കിനി എന്നീ ദിക്ശാലകളും ചേര്ന്ന നിര്മ്മാണ രൂപമാണ് ചതുശ്ശാലകള് അഥവാ നാലുകെട്ടുകള്. നടുമുറ്റത്തേക്ക് ദര്ശനമായിട്ടുള്ള നാലു ഗൃഹങ്ങള് എന്നര്ഥം. കോണ്ശാലകളുടെ വിന്യാസ ക്രമത്തിലുള്ള വ്യത്യസ്തകളാല് നാലുകെട്ടുകളും വിവിധ നാമങ്ങളാല് സൂചിപ്പിക്കപ്പെട്ട വ്യത്യസ്ത നിര്മാണ രൂപങ്ങള് തന്നെ. ഭിന്ന-അഭിന്ന- മിശ്ര തുടങ്ങിയ വ്യത്യസ്ത ശാലകളെക്കുറിച്ചുള്ള വാസ്തുവിദ്യാ നിയമങ്ങള് ഗ്രന്ഥങ്ങളില് തന്നെ കാണുന്നുണ്ട്.
കേരളത്തില് തന്നെ സമുദായ-പ്രാദേശിക ഭേദങ്ങളിലുള്ള വ്യത്യസ്ത സമ്പ്രദായങ്ങളിലുള്ള നാലുകെട്ടുകളാണ് കാണാന് സാധിക്കുന്നത്. വടക്കു- തെക്കു- മധ്യകേരളങ്ങളിലെ നാലുകെട്ട് രീതി വ്യത്യസ്തങ്ങളാണ്, എന്നിരുന്നാലും സങ്കല്പ്പം ശാസ്ത്രസമ്മതമായതും ഏകാത്മസ്വഭാവത്തോടുകൂടിയതുമാകുന്നു.
കൂടുതല് മുറികളും സൗകര്യങ്ങളും വേണ്ട സാഹചര്യങ്ങളും ഉയര്ന്ന സാമൂഹിക സാമ്പത്തിക അവസ്ഥകളുമാണ് നാലുകെട്ട് അടിസ്ഥാനം.
താഴ്ന്നു കിടക്കുന്ന നടുമുറ്റത്തില് ഉള്കൊള്ളുന്ന വായു സൂര്യപ്രകാശത്തില് ചൂട് പിടിച്ച് ഉയര്ന്ന് പൊങ്ങുകയും തദ്ഭാഗത്തേക്ക് പുറത്തുനിന്ന് വായുവിനെ സ്വീകരിക്കുകയും ചെയ്യുന്ന സ്വാഭാവികമായ വായുക്രമീകരണ രീതിയാണിത്.
നിര്മാണത്തില് കൂടുതല് കൃത്യത പാലിക്കണം. അതല്ലെങ്കില് ചെറിയ പിഴവുകള് പോലും ആവാസത്തിനു ദോഷകരമാകും. അതുകൊണ്ടുതന്നെ വാസ്തുവിദ്യാ നിയമങ്ങള് നാലുകെട്ടുകളില് കണിശങ്ങളാകുന്നു. തെക്കു വടക്ക് ദീര്ഘമേറിയതും ബ്രഹ്മസ്ഥാനത്തെ പൂര്ണമായും ഉള്കൊള്ളുന്നതും ധ്വജയോനി സമ്പ്രദായത്തിലുള്ളതുമായ നടുമുറ്റങ്ങള്, മര്മസ്ഥാനങ്ങള് വരാന്തയില് വരുന്ന വിധമുള്ള ശാലാ വിന്യാസങ്ങള്, നടുമുറ്റത്തേക്ക് ദര്ശനമായുള്ള ദിക് ശാലകള്, അവകളുടെ ദിശാസംബന്ധിയായ ഗണിത വ്യവസ്ഥകള് എന്നിവ ഇതില് പ്രാധാന്യമര്ഹിക്കുന്ന ചിലതാണ്.
നാലുകെട്ടുകളുടെ സംയോജനങ്ങളാല് എട്ടുകെട്ടുകളും പതിനാറു കെട്ടുകളും അവശ്യാനുസരണം ഉപയോഗിച്ചിരുന്നു. ആധുനിക കാലത്തെ ഫഌറ്റ്, വലിയ കെട്ടിടങ്ങള് എന്നിവയ്ക്ക് ഏറ്റവും യോജിച്ച നിര്മാണ ശൈലിയായും ഉപയോഗിച്ച് തുടങ്ങിയിട്ടുണ്ട് ഇവ.
ഡോ. രാധാകൃഷ്ണന് ശിവന്
