ബെംഗളൂരു: ലിംഗായത്ത് നേതാവും മുൻ മുഖ്യമന്ത്രിയുമായ യെഡിയൂരപ്പ രാഷ്ട്രീയത്തിൽ 5 പതിറ്റാണ്ടു പിന്നിടുന്നതിന്റെ വാർഷികം ആഘോഷിക്കാനൊരുങ്ങി കർണാടക ബി.ജെ.പി. ‘യെദ്യൂരപ്പ അഭിമാനോത്സവ’ എന്നപേരിൽ മേയ് ഒൻപതിന് ചിത്രദുർഗയിൽ വലിയ സമ്മേളനം സംഘടിപ്പിക്കാനാണ് തീരുമാനം. കേന്ദ്ര ആഭ്യന്തര മന്ത്രി അമിത് ഷാ പരിപാടി ഉദ്ഘാടനം ചെയ്യും. ‘യെഡിയൂരപ്പ അഭിമാനോത്സവ’ യുടെ ലോഗോ കഴിഞ്ഞ ദിവസം പ്രകാശനം ചെയ്തു.
സമ്മേളനത്തിൽ മുൻ മുഖ്യമന്ത്രിമാരും മന്ത്രിമാരും മഠാധിപതികളും കർഷക നേതാക്കളും പങ്കെടുക്കും. പരിപാടിയിൽ 10 ലക്ഷം ബിജെപി പ്രവർത്തകരെ പങ്കെടുപ്പിക്കാനാണു ലക്ഷ്യമിടുന്നത്. ബി.ജെ.പി.യുടെ മുതിർന്ന നേതാക്കളിലൊരാളായ യെദ്യൂരപ്പ ഇപ്പോൾ പാർട്ടിയുടെ പാർലമെന്ററി ബോർഡിലും ദേശീയ തിരഞ്ഞെടുപ്പുസമിതിയിലും അംഗമാണ്.
