നിസാന് കമ്പനി തങ്ങളുടെ പുതിയ ലോഗോ പുറത്തിറക്കി. ജാപ്പനീസ് വാഹന നിര്മാതാക്കളായ നിസാന് തീര്ത്തും ലളിതമായ ലോഗോയാണ് അവതരിപ്പിച്ചിരിക്കുന്നത്. കമ്പനി പുതുതായി ഇറക്കുന്ന എല്ലാ വാഹനങ്ങളിലും ഈ ലോഗോയാണ് ഉപയോഗിക്കുകയെന്നും നിസാന് വ്യക്തമാക്കി. പുത്തന് കോംപാക്ട് എസ് യു വിയായ ‘മാഗ്നൈറ്റി’ല് ഈ ലോഗോയാവും നിസാന് ഉപയോഗിക്കുക.
സാങ്കേതികവിദ്യയാല് സമ്പന്നവും സ്റ്റൈലിഷുമായ ബി-എസ്.യു.വി ഈ വര്ഷം അവസാനത്തോടെ ഇന്ത്യന് വിപണിയിലെത്തും. ജപ്പാനില് രൂപകല്പ്പന ചെയ്യുന്ന വാഹനം ഇന്ത്യയിലാണ് നിര്മ്മിക്കുക.
‘മാഗ്നറ്റിക്’, ‘ഇഗ്നൈറ്റ്’ എന്നീ പദങ്ങളുടെ സംയോജനമാണ് മാഗ്നൈറ്റ് എന്ന പേര്. വാഹനത്തിന്റെ രൂപകല്പ്പനയെയും ഗുണങ്ങളെയും പ്രമുഖമാക്കുന്നതാണ് മാഗ്നൈറ്റ് എന്ന പദം. നിസാന് ഇന്ത്യയില് കൊണ്ടുവരാന് ആഗ്രഹിക്കുന്ന ഒരു പുതിയ യുഗത്തിന്റെ തുടക്കത്തിനെയാണ് ഇഗ്നൈറ്റ് എന്ന വാക്കിലൂടെ ഉദ്ദേശിക്കുന്നത്.
‘മേക്ക് ഇന് ഇന്ത്യ, മേക്ക് ഫോര് ദി വേള്ഡ്’ എന്ന തത്ത്വചിന്തയിലാണ് നിസ്സാന് മാഗ്നൈറ്റ് നിര്മ്മിക്കുന്നത്. ഇന്ത്യന് ഉപഭോക്താക്കളുടെ ആവശ്യങ്ങളും അഭിലാഷങ്ങളും കണക്കിലെടുത്തായിരിക്കും രൂപകല്പ്പന. ശക്തവും ചലനാത്മകവുമായ റോഡ് സാന്നിധ്യം വാഹനം വാഗ്ദാനം ചെയ്യുന്നു. സ്റ്റൈലിഷ് ഡിസൈനോടുകൂടിയ സവിശേഷതകളാല് സമ്പന്നമായ പ്രീമിയം വാഹനമായിരിക്കും നിസാന് മാഗ്നൈറ്റ്.
