കാസര്കോട്: അന്താരാഷ്ട്ര സ്വര്ണ്ണക്കടത്ത് സംഘങ്ങള്ക്കും ആഗോള ഭീകരതയ്ക്കും കൂട്ടുനില്ക്കുന്ന കേന്ദ്രമായി മുഖ്യമന്ത്രിയുടെ ഓഫീസ് മാറികഴിഞ്ഞിരിക്കുകയാണെന്ന് ബിജെപി ദേശീയ എക്സിക്യൂട്ടീവ് കമ്മറ്റിയംഗം പി.കെ.കൃഷ്ണദാസ് പറഞ്ഞു. ബിജെപി കാസര്കോട് ജില്ലാ കമ്മറ്റി ഓഫീസ് ഉദ്ഘാടന ചടങ്ങില് സംസാരിക്കുകയായിരുന്നു അദ്ദേഹം.
ഓരോ ദിവസം കഴിയുമ്പോഴും ഇതിനുള്ള കൂടുതല് തെളിവുകള് പുറത്ത് വന്നുകൊണ്ടിരിക്കുകയാണ്. ശബരിമലയില് സ്ത്രീകളെ കയറ്റിയതുപോലെ തന്നെ വലിയൊരു ഗൂഢാലോചന സ്വര്ണ്ണക്കടത്ത് പ്രതികളെ ബാംഗഌരിലെത്തിച്ചതിന് പിന്നിലും നടന്നിട്ടുണ്ട്. കേരള രാഷ്ട്രീയ രംഗം ധ്രുവീകരണ കാലഘട്ടത്തിലൂടെയാണ് കടന്ന് പോകുന്നത്.
കേന്ദ്രത്തിലെ രാഷ്ട്രീയ വികസന ചലനത്തിനൊപ്പം കേരളവും നടക്കാന് തുടങ്ങിയിരിക്കുന്നു. കോണ്ഗ്രസ്സും സിപിഎമ്മും തമ്മില് അടിസ്ഥാനപരമായി യാതൊരുമാറ്റവുമില്ല. പരമ്പരാഗതമായ അവര് കള്ളപ്രചരണങ്ങളിലൂടെ അണിനിരത്തിയിട്ടുള്ള ജനങ്ങളിന്ന് മാറ്റത്തിന്റെ ചിന്താപാതയിലാണ്.
പത്തൊമ്പതാം നൂറ്റാണ്ടില് വലിയ സാമൂഹ്യനവോത്ഥാനമാണ് കേരളത്തില് നടന്നിട്ടുള്ളതെങ്കില് ഇന്ന് കേരളരാഷ്ട്രീയത്തില് നവോത്ഥാനത്തിനുള്ള സാഹചര്യമാണ് ഉരുതിരിഞ്ഞിരിക്കുന്നതെന്ന് കൃഷ്ണദാസ് കൂട്ടിച്ചേര്ത്തു.
