മൂന്നാര്: കെഡിഎച്ച് വില്ലേജില് അനധികൃതമായി നൂറിലധികം കൈവശ അവകാശ രേഖ നല്കി സംഭവത്തില് ഉന്നതതല സംഘം ആദ്യഘട്ട റിപ്പോര്ട്ട് നല്കി.
ദേവികുളം സബ് കളക്ടര് പ്രേം കൃഷ്ണന്, ജില്ലാ അസി. കളക്ടര് സൂരജ് എന്നിവരുടെ നേതൃത്വത്തിലുള്ള ഉന്നതതല സംഘമാണ് 18 പേരുടെ വിവരങ്ങളടങ്ങിയ റിപ്പോര്ട്ട് ജില്ലാ കളക്ടര് എച്ച്. ദിനേശന് കൈമാറിയത്. നേരത്തെ ദേവികുളം തഹസീല്ദാരും ഡെപ്യൂട്ടി കളക്ടറും നടത്തിയ അന്വേഷണത്തില് കെഡിഎച്ച് വില്ലേജില് മാത്രം വ്യാജമായി 110 കൈവശ അവകാശ രേഖ നല്കിയതായാണ് കണ്ടെത്തിയത്. ഇതില് 18 പേരുടെ വിവരങ്ങളാണ് ആദ്യഘട്ടത്തില് ശേഖരിച്ചത്. സ്ഥലത്ത് നേരിട്ടെത്തി നിജസ്ഥിതി ബോധ്യപ്പെട്ടാണ് റിപ്പോര്ട്ട് തയ്യാറാക്കുന്നത്. പരിശോധന നടത്തിയ ശേഷം ഉടമകളെന്ന് അവകാശപ്പെടുന്നവരുടെ വാദം കേള്ക്കും. വ്യാജമെന്ന് തെളിഞ്ഞാല് ഉടന് റദ്ദാക്കും.
ഇതേ വിഷയത്തില് മുമ്പ് അഞ്ച് റവന്യൂ ജീവനക്കാരെ അന്വേഷണ വിധേയമായി കളക്ടര് സസ്പെന്ഡും ചെയ്തിരുന്നു. പിന്നാലെയാണ്് കൈവശ അവകാശരേഖ പരിശോധന ആരംഭിച്ചത്.
2018 മുതല് നല്കിയ രേഖകളിലാണ് കൃത്രിമം നടന്നിരിക്കുന്നതെന്നാണ് നേരത്തെ നടത്തിയ അന്വേഷണത്തില് കണ്ടെത്തിയിരുന്നത്. കെഡിഎച്ച് വില്ലേജില് വ്യാപക ക്രമക്കേട് കണ്ടെത്തിയ സാഹചര്യത്തില് റവന്യൂ വിജിലന്സിനെക്കൊണ്ട് അന്വേഷിപ്പിക്കാനും മൂന്നാറിലെ മറ്റു പ്രദേശങ്ങളില് പരിശോധന നടത്താനും ജില്ലാ ഭരണകൂടം നേരത്തെ തീരുമാനിച്ചിരുന്നു.
