കാസര്കോട്: ലോക് ഡൗണ് മറപിടിച്ച് കാസര്കോട് ഉക്കിനടുക്കയിലെ മെഡിക്കല് കോളേജില് പിന്വാതിലിലൂടെ കമ്യൂണിസ്റ്റ് പാര്ട്ടിക്കാരെ തിരുകി കയറ്റാന് ശ്രമം നടന്നാല് ശക്തമായ സമരത്തിലൂടെ എതിര്ക്കൂമെന്ന് ബിജെപി മണ്ഡലം ജനറല് സെക്രട്ടറി പി.ആര്.സുനില് പറഞ്ഞു. യുവമോര്ച്ച കാസര്കോട് മണ്ഡലം കമ്മറ്റി നടത്തുന്ന യുവജന വഞ്ചനക്കെതിരെ നിരാഹര സത്യാഗ്രഹം ഉദ്ഘാടനം ചെയ്യുകയായിരുന്നു അദ്ദേഹം.
ഉക്കിനടുക്ക മെഡിക്കല് കോളേജില് പാര്ട്ടികരെ തിരുകി കയറ്റാനുള്ള ശ്രമം അണിയറയില് നടക്കുകയാണ്. നോട്ടിഫിക്കേഷന് പോലും ചുരുങ്ങിയ ദിവസത്തില് പിന്വലിച്ചത് ഇതിന്റെ ഉദാഹരണമാണ്. സംസ്ഥാനത്ത് ലക്ഷക്കണക്കിന് ഉദ്യോഗാര്ത്ഥികള് പരീക്ഷയെഴുതി നിയമനത്തിനുവേണ്ടി കാത്തിരിക്കുമ്പോള് പിന്വാതില് നിയമനം നടത്താനും സ്വന്തക്കാരെയും പാര്ട്ടിക്കാരെയും കയറ്റാനുള്ള ശ്രമമാണ് നടക്കുന്നത്.
ഇരുപത്തിനാലോളം തസ്തികകളുടെ കാലാവധി ജൂലായില് അവസാനിക്കാനിരിക്കേ യാതൊരു നടപടിയും കൈക്കൊള്ളാന് സര്ക്കാര് തയ്യാറായിട്ടില്ല. ഇത് യുവാക്കളോടുള്ള വഞ്ചനയാണെന്ന് സുനില് പറഞ്ഞു.
യുവമോര്ച്ച മണ്ഡലം പ്രസിഡന്റ രക്ഷിത്ത് കെദിലായയും ജനറല് സെക്രട്ടറി അജിത്ത് കുമാരനും സംസ്ഥാന അധ്യക്ഷന് പിന്തുണയുമായി നിരാഹാരമിരുന്നു. മണ്ഡലം സെക്രട്ടറി ശരത്ത്പുണ്ടൂര്, മണ്ഡലം ട്രഷറര് രാമചന്ദ്രന്, പ്രമോദ് ബെളിഞ്ച, അഗ്നേഷ്, മധൂര് പഞ്ചായത്ത് കമ്മറ്റി പ്രസിഡണ്ട് അശോക്, ഉണ്ണികൃഷ്ണന് തുടങ്ങിയവര് സംബന്ധിച്ചു. സമാപന പരിപാടി യുവമോര്ച്ച ജില്ലാ പ്രസിഡണ്ട് ധനഞ്ജയന് മധൂര് ഉദ്ഘാടനം ചെയ്തു.
