കണ്ണൂര്‍: കോവിഡ് രോഗികളും നിരീക്ഷണത്തിലുളളവരുമായി നിരന്തര സമ്പര്‍ക്കത്തില്‍ ഏര്‍പ്പെട്ടിരിക്കുന്ന ആശാവര്‍ക്കര്‍മാര്‍ക്ക് കോവിഡ് പരിശോധന നടത്താനുളള നടപടികള്‍ അടിയന്തിരമായി സ്വീകരിക്കണമെന്ന് സംസ്ഥാന മനുഷ്യാവകാശ കമ്മീഷന്‍.
കണ്ണൂര്‍, എറണാകുളം ജില്ലകളില്‍ ആശാവര്‍ക്കര്‍മാര്‍ക്കും സാനിറ്റേഷന്‍ പ്രവര്‍ത്തകര്‍ക്കും കോവിഡ് പരിശോധന നടത്തുന്നില്ലെന്ന പരാതിയിലാണ് കമ്മീഷന്‍ ജുഡീഷ്യല്‍ അംഗം പി. മോഹനദാസിന്റെ ഉത്തരവ്. റവന്യൂ സെക്രട്ടറിക്ക് പുറമേ കണ്ണൂര്‍, എറണാകുളം ജില്ലാ കളക്ടര്‍മാരും റിപ്പോര്‍ട്ട് സമര്‍പ്പിക്കണം.
കണ്ണൂര്‍, എറണാകുളം ജില്ലകളിലാണ് പരിശോധന നടത്താത്തത്. ആശാവര്‍ക്കര്‍മാര്‍ക്ക് കോവിഡ് പരിശോധന നടത്തണമെന്ന ആവശ്യം മുമ്പേ ഉയര്‍ന്നതാണ്. എന്നാല്‍ സര്‍ക്കാര്‍ നടപടി സ്വീകരിച്ചിട്ടില്ല. ചില ജില്ലകളില്‍ ആശാ വര്‍ക്കര്‍മാര്‍ക്കിടയില്‍ നത്തിയ പരിശോധനയില്‍ ചിലര്‍ പോസിറ്റീവായി മാറിയ സാഹചര്യത്തിലാണ് എല്ലാവര്‍ക്കും പരിശോധന വേണമെന്ന ആവശ്യം ഉയര്‍ന്നത്. പരാതികളും ആശങ്കകളും പൂര്‍ണ്ണമായും പരിഹരിക്കണമെന്ന് കമ്മീഷന്‍ ആവശ്യപ്പെട്ടു. മനുഷ്യാവകാശ പ്രവര്‍ത്തകനായ റെനീഷ് കാക്കടവത്ത് സമര്‍പ്പിച്ച പരാതിയിലാണ് ഉത്തരവ്.
ജന്മഭൂമി ഓണ്‍ലൈന്‍