പേരാമ്പ്ര: ചെങ്ങോടുമല തകര്‍ക്കാനുള്ള ഭരണകൂടത്തിന്റെ ശ്രമം ജനവഞ്ച നയാണെന്ന് നോവലിസ്റ്റ് ടി.പി. രാജീവന്‍. ചൈങ്ങോട്മല കരിങ്കല്‍ ഖനനത്തിന് അനുമതി കൊടുക്കരുതെന്നാവശ്യപ്പെട്ട് ആക്ഷന്‍ കൗണ്‍സിലിന്റെ നേതൃത്വത്തില്‍ 10000 കത്തയക്കുന്ന കാമ്പയിന്‍ ഉദ്ഘാടനം ചെയ്യുകയായിരുന്നു അദ്ദേഹം.
നിരവധി ശാസ്ത്രീയ പഠനങ്ങള്‍ ഇവിടെ ഖനനം പാടില്ലെന്ന് വ്യക്തമാക്കിയിരിക്കെ മോഷ്ട്ടാക്കളെ പോലെ വന്ന രണ്ട് വിദഗ്ധ സംഘാംഗങ്ങള്‍ ക്വാറി മുതലാളിക്ക് അനുകൂലമായ റിപ്പോര്‍ട്ട് തയ്യാറാക്കിയത് ജനങ്ങളെ പരിഹസിക്കലാണെന്നും അദ്ദേഹം കൂട്ടിച്ചേര്‍ത്തു.
കേരളം നിയമ ലംഘനങ്ങളുടെ നാടായി മാറിയിരിക്കുകയാണെന്നും രാജീവന്‍ പറഞ്ഞു. വിദഗ്ധ റിപ്പോട്ടുകള്‍ വില കൊടുത്തു വാങ്ങാവുന്ന അവസ്ഥയാണെന്നും അദ്ദേഹം ചൂണ്ടിക്കാട്ടി. ഗ്രാമപഞ്ചായത്തംഗം മേപ്പാടി ശ്രീനിവാസന് കത്ത് കൈമാറി. കല്പകശ്ശേരി ജയരാജന്‍, ലിനീഷ് നരയംകുളം, എം. കെ. സതീഷ്, കെ. എം. രാജന്‍ എന്നിവര്‍ പങ്കെടുത്തു.
