പന്തീരാങ്കാവ്: അറപ്പുഴയില് കാണാതായ ബന്ധുക്കളായ രണ്ട് കുട്ടികളുടെ മൃതദേഹം കണ്ടെത്തി. അറപ്പുഴ തട്ടാരക്കല് പുനത്തില് മീത്തല് ഷാജിയുടെ മകന് ഹരിനന്ദ് (13), ഷാജിയുടെ സഹോദരിയുടെ മകന് പൊക്കുന്ന് ചങ്ങരോത്ത് മീത്തല് സജിതാനന്ദന്റെ മകന് ശബരീനാഥ് (14) എന്നിവരുടെ മൃതദേഹങ്ങളാണ് കണ്ടെത്തിയത്.
വെള്ളിയാഴ്ച രാവിലെ എട്ടോടെയാണ് ശബരിനാഥിന്റെ മൃതദേഹം കിട്ടിയത്. അവിടെ നിന്ന് രണ്ട് കിലോമീറ്റര് അകലെ നിന്ന് ഉച്ചയ്ക്ക് 12.30ഓടെയാണ് ഹരിനന്ദിന്റെ മൃതദ്ദേഹം കണ്ടെത്തിയത്. വ്യാഴാഴ്ച വൈകിട്ട് നാലുമണിയോടെയാണ് ഇരുവരെയും കാണാതായത്. അടുത്ത വീട്ടിലേക്ക് കുടുംബശ്രീയുടെ പണം നല്കാന് പറഞ്ഞയച്ച ഇരുവരും അവിടെ പണം നല്കി മടങ്ങിയെങ്കിലും വീട്ടില് തിരിച്ചെത്താത്തതിനെ തുടര്ന്നാണ് തിരച്ചില് ആരംഭിച്ചത്.
ഹരിനന്ദിന്റെ വീടിനടുത്തായി അറപ്പുഴയുടെ തീരത്ത് കുട്ടികളെ കണ്ടതായി വിവരം ലഭിച്ചതിനെ തുടര്ന്ന് പന്തീരാങ്കാവ് പോലീസിന്റെ സാന്നിധ്യത്തില് നാട്ടുകാര് അറപ്പുഴയില് തിരച്ചില് നടത്തുകയായിരുന്നു. രാത്രിയായതോടെ തെരച്ചില് അവസാനിപ്പിച്ചു. വെള്ളിയാഴ്ച രാവിലെ നാട്ടുകാര് വീണ്ടും അറപ്പുഴയില് തിരച്ചില് തുടര്ന്നപ്പോഴാണ് രണ്ടു കുട്ടികളുടെയും മൃതദേഹം കണ്ടെടുത്തത്. ശബരീനാഥ് രണ്ട് ദിവസം മുമ്പാണ് അറപ്പുഴയിലെ അമ്മാവന്റെ വീട്ടിലെത്തിയത്.
ഹരിനന്ദ് കൊടല് നടക്കാവ് ഗവ. യുപി സ്കൂളില് ഏഴാം ക്ലാസ് വിദ്യാര്ത്ഥിയും ശബരീനാഥ് കിണാശ്ശേരി ഗവ. ഹയര് സെക്കന്ഡറി സ്കൂളില് ഒമ്പതാം ക്ലാസ് വിദ്യാര്ത്ഥിയുമാണ്. മൃതദേഹം കോഴിക്കോട് മെഡിക്കല് കോളേജ് മോര്ച്ചറിയിലേക്ക് മാറ്റി. പോസ്റ്റുമോര്ട്ടത്തിന് ശേഷം ഇന്ന് മാവൂര് റോഡ് ശ്മശാനത്തില് സംസ്കാരം നടക്കും. ഹരിനന്ദിന്റെ അമ്മ: വിഗിന. സഹോദരങ്ങള്: ഐശ്വര്യ, ആത്മിയ. ശബരീനാഥിന്റെ അമ്മ: ഷൈജ. സഹോദരി: വര്ഷ.
