കല്പ്പറ്റ: വയനാട് ജില്ലയില് രണ്ട് പേര്ക്ക് കൂടി കോവിഡ് സ്ഥിരീകരിച്ചു. എടവക പഞ്ചായത്ത് പരിധിയിലെ 30 വയസ്സുകാരനും 47 കാരിയായ തമിഴ്നാട് ഗൂഡല്ലൂര് സ്വദേശിനിക്കുമാണ് ജില്ലയില് കോവിഡ് സ്ഥിരീകരിച്ചത്. എടവക സ്വദേശി മാലദ്വീപില് നിന്നും തിരിച്ചെത്തിയതാണ്. തമിഴ്നാട് സ്വദേശിനി ദുബായില് നിന്നും മേയ് 17 ന് കോഴിക്കോട് വിമാനത്താവളം വഴി ജില്ലയിലെത്തിയതാണ്.
ഇരുവരും കല്പ്പറ്റയിലെ സ്വകാര്യ ഹോട്ടലില് നിരീക്ഷണത്തില് കഴിയുകയായിരുന്നു. പരിശോധന ഫലം പോസിറ്റീവായതിനെ തുടര്ന്ന് ഇരുവരെയും മാനന്തവാടി ജില്ലാ ആശുപത്രിയില് അഡ്മിറ്റു ചെയ്തു. ജില്ലയില് രണ്ട് പേര് കൂടി രോഗമുക്തരായി. കോവിഡ് രോഗം സ്ഥിരീകരിച്ച് മാനന്തവാടി ജില്ലാ ആശുപത്രിയില് ചികിത്സയിലായിരുന്ന പനമരം പഞ്ചായത്ത് പരിധിയില് പള്ളിക്കുന്ന് സ്വദേശിയായ 49 കാരിയും മേപ്പാടി സ്വദേശിയായ 62 കാരനുമാണ് പരിശോധന ഫലം നെഗറ്റീവായതിനെ തുടര്ന്ന് ആശുപത്രി വിട്ടത്.
പളളിക്കുന്ന് സ്വദേശിയെ മേയ് 27 നും മേപ്പാടി സ്വദേശിയെ 28 നുമാണ് ആശുപത്രിയില് പ്രവേശിപ്പിച്ചത്. കോവിഡ് പ്രതിരോധത്തിന്റെ ഭാഗമായി ജില്ലയില് വ്യാഴാഴ്ച്ച 218 പേരെ കൂടി നിരീക്ഷണത്തിലാക്കി. നിലവില് ആകെ 3689 പേരാണ് നിരീക്ഷണത്തിലുളളത്. പട്ടികവര്ഗ്ഗ വിഭാഗത്തില്പെടുന്ന 846 ആളുകള് ഉള്പ്പെടെ 1921 പേര് കോവിഡ് കെയര് സെന്ററുകളിലാണ് നിരീക്ഷണത്തില് കഴിയുന്നത്.
അതേസമയം വ്യാഴാഴ്ച്ച 282 പേര് നിരീക്ഷണകാലം പൂര്ത്തിയാക്കിയിട്ടുണ്ട്. രോഗം സ്ഥിരീകരിച്ച 13 പേര് മാനന്തവാടി ജില്ലാ ആശുപത്രിയിലും രണ്ട് പേര് കോഴിക്കോട് മെഡിക്കല് കോളേജിലുമാണ് ചികില്സയില് കഴിയുന്നത്.മുത്തങ്ങ വഴി 15145 പേര് പ്രവേശിച്ചു. കോവിഡ് 19 രോഗ വ്യാപന പശ്ചാത്തലത്തില് ഇതര സംസ്ഥാനങ്ങളില് നിന്നും കേരളത്തിലേക്ക് ജൂണ് 3 വരെ പ്രവേശിച്ചവരുടെ എണ്ണം 15145 ആയി.ഇതില് 10004 പുരുഷന്മാരും, 3611 സ്ത്രീകളും 1530 കുട്ടികളും ഉള്പ്പെടും.1488 പേരെ ഇന്സ്റ്റിറ്റിയൂഷണല് ക്വാറന്റയിനില് പ്രവേശിപ്പിച്ചു. 5840 വാഹനങ്ങളാണ് അതിര്ത്തി കടന്നെത്തിയത്.
