കുന്നത്തുകാല്: റോഡുവക്കിലെ മാലിന്യക്കൂമ്പാരം മൂലം പൊറുതിമുട്ടി പൊതുജനം. കാരക്കോണം-വെള്ളറട റൂട്ടിലെ ചെറിയകൊല്ല ജംഗ്ഷനു സമീപം ഉണ്ടന്കോട് കുരിശടി റോഡുവക്കിലാണ് മാലിന്യനിക്ഷേപം. മാസങ്ങളായി കൂട്ടിയിട്ടിരിക്കുന്ന മാലിന്യം നീക്കം ചെയ്യാന് അധികൃതരുടെ ഭാഗത്തു നിന്നും നടപടിയൊന്നുമില്ല.
മഴക്കാലത്ത് മാലിന്യത്തില് നിന്നും മലിനജലം ഒലിച്ചിറങ്ങുന്നത് ചുറ്റുപാടും ദുര്ഗന്ധമുണ്ടാക്കുന്നതിനൊപ്പം പകര്ച്ചവ്യാധികള്ക്കും കാരണമായേക്കും. വാര്ഡുതല ശുചീകരണത്തിന് ഫണ്ട് വകയിരുത്തിയിട്ടുണ്ടെങ്കിലും പ്രധാന റോഡിലെ മാലിന്യം നീക്കം ചെയ്യാന് വാര്ഡ് പ്രതിനിധി ഉള്പ്പെടെയുള്ളവര് തയാറാകണമെന്നാവശ്യപ്പെട്ട് ബിജെപി കുന്നത്തുകാല് മേഖലാ കമ്മറ്റി പ്രസിഡന്റ് ചെറിയകൊല്ല പ്രദീപിന്റെ നേതൃത്വത്തില് ചെറിയകൊല്ല വാര്ഡ് കമ്മറ്റി പ്രതിഷേധസമരം സംഘടിപ്പിച്ചു.
