ലഖ്നൗ: ഉത്തര്പ്രദേശിലേയ്ക്ക് മടങ്ങി വരുന്ന അന്യസംസ്ഥാന തൊഴിലാളികളില് നിന്ന് യാത്രാകൂലി ഈടാക്കില്ലെന്നും ഇതിനായി റെയില്വേയില് മുന്കൂറായി ഒരു തുക അടയ്ക്കുമെന്നും യുപി മുഖ്യമന്ത്രി യോഗി ആദിത്യനാഥ്. മാസ്ക്ക് ധരിക്കാത്ത കുടിയേറ്റ തൊഴിലാളികളില് നിന്നും 100 രൂപ വീതം പിഴയീടാക്കാനും സംസ്ഥാന സര്ക്കാരിന്റെ നിര്ദ്ദേശമുണ്ട്.
വിവിധയിടങ്ങളില് കുടുങ്ങിക്കിടന്നിരുന്ന വിദ്യാര്ത്ഥികളെ യോഗി ആദിത്യനാഥ് ബസുകള് ഏര്പ്പെടുത്തി തിരികെ നാട്ടിലെത്തിച്ചത് വലിയ വാര്ത്തയായിരുന്നു.ഇതോടൊപ്പം അന്യസംസ്ഥാനങ്ങളില് നിന്നും തിരികെ വരുന്നവരുടെയെല്ലാം കൃത്യമായ വിവരങ്ങള് സൂക്ഷിക്കാന് മുഖ്യമന്ത്രി നിര്ദ്ദേശിച്ചിട്ടുണ്ട്.
ഏറ്റവും പുതിയ കണക്കുകളനുസരിച്ച് 318 ട്രെയിനുകളിലായി മൂന്ന് ലക്ഷത്തോളം തൊഴിലാളികളെയാണ് ഉത്തര്പ്രദേശിലേക്ക് തിരികെയെത്തിച്ചത്.ഇന്ന് വൈകുന്നേരത്തോടെ 67 ട്രെയിനുകള് കൂടി സംസ്ഥാനത്ത് എത്തിച്ചേരും.
