കാസര്കോട്: മതിയായ രേഖകളൊന്നും തന്നെ ഇല്ലാഞ്ഞിട്ടും സാങ്കേതികത്വം പറഞ്ഞ് ചികിത്സ നിഷേധിക്കാതെ മനുഷ്യത്വ പൂര്ണമായ ഇടപെടലില് കാസര്കോട് ജില്ലയിലെ കുമ്പളയില് അന്യ സംസ്ഥാന തൊഴിലാളിയായി കഴിയുന്ന കര്ണാടക സ്വദേശിനിക്ക് ജീവിതം തിരികെ പിടിക്കാനുള്ള സാഹചര്യമൊരുങ്ങി. കര്ണാടക ഹാസന് സ്വദേശികളായ സുജാതയും ധനപാലയും ഇരുപത് വര്ഷത്തോളമായി കുമ്പളയില് കൂലിപ്പണിയെടുത്താണ് ജീവിച്ചു വരുന്നത്.
വാടക വീട്ടില് കഴിയുന്ന ഇവര്ക്ക് റേഷന് കാര്ഡോ മറ്റു രേഖകളോ ഇല്ല. ആകെയുള്ളത് കര്ണാടക വിലാസത്തിലുള്ള ആധാര് കാര്ഡ് മാത്രമാണ്. ശാരീരിക അസ്വസ്ഥതകളെ തുടര്ന്ന് സുജാത കാസര്കോട്ടെ സ്വകാര്യ ആശുപത്രിയില് ഏപ്രിലില് പരിശോധന നടത്തിയിരുന്നു.
മെയ് നാലിനായിരുന്ന ഈ മുപ്പത്തിയൊന്നുകാരിക്ക് വായില് അര്ബുദം സ്ഥിരീകരിച്ച് റിപ്പോര്ട്ട് വന്നത്. അവിടെ നിന്നും വിദഗ്ധ ചികിത്സയ്ക്കായി മലബാര് കാന്സര് സെന്ററിലേക്ക് പോവുകയും ഇന്ന് ശസ്ത്രക്രിയക്ക് തിയ്യതിയും നിശ്ചയിച്ചു.
ഹെല്ത്ത് കാര്ഡ് ഉണ്ടെങ്കില് മാത്രമേ സൗജന്യ ശസ്ത്രക്രിയ സാധ്യമാവുകയെന്നാണ് കാന്സര് സെന്റര് അധികൃതര് അറിയിച്ചത്. കുമ്പളയില് തന്നെ താമസമുള്ള സുജാതയുടെ സഹോദരി ഗംഗയ്ക്ക് കര്ണാടകയിലെ റേഷന് കാര്ഡും നാഷണല് ഹെല്ത്ത് അതോറിറ്റി അനുവദിച്ച കാര്ഡും ഉള്ളതായി അറിയാന് സാധിച്ചു. സഹോദരിയുടെ ഈ രേഖകള് ഉപയോഗിച്ച് അടിയന്തരമായി ശനിയാഴ്ച ഉച്ചയ്ക്ക് തന്നെ ഹെല്ത്ത് കാര്ഡ് തയ്യാറാക്കി കിട്ടിയതോടെ സുജാതയ്ക്ക് ശസ്ത്രക്രിയയ്ക്കുള്ള വഴിതുറക്കുകയായിരുന്നു.
