ന്യൂദല്‍ഹി: കൊറോണ വൈറസിന്റെ വാഹകര്‍ വവ്വാലുകള്‍ തന്നെയെന്ന് വ്യക്തമാക്കുന്ന പഠന റിപ്പോര്‍ട്ട് പ്രസിദ്ധീകരിച്ച് ജേണല്‍ സയന്റിഫിക്. ദശലക്ഷക്കണക്കിന് വര്‍ഷങ്ങളായി വവ്വാലുകള്‍ വൈറസിനെ ശരീരത്തില്‍ വഹിക്കുന്നുണ്ടെന്നും വിവിധ തരം വവ്വാലുകളില്‍ കൊറോണവൈറസിന്റെ സാന്നിധ്യം കണ്ടെത്തിയിട്ടുണ്ടെന്നും പഠനത്തില്‍ പറയുന്നു.
വവ്വാലുകളിലെ വ്യത്യസ്തമായ 36 വിഭാഗങ്ങളെയാണ് പഠന വിധേയമാക്കിയത്. പശ്ചിമ ഇന്ത്യന്‍ മഹാസമുദ്രത്തിലെയും ആഫ്രിക്കയുടെ സമീപ പ്രദേശങ്ങളിലുമുള്ള വവ്വാലുകളെയാണ് ഇതിനായി ഉപയോഗിച്ചത്. ഇതില്‍ നിന്നാണ് കാലങ്ങളായി വവ്വാലുകളും കൊറോണ വൈറസും തമ്മില്‍ ബന്ധമുണ്ടെന്ന് കണ്ടെത്തിയതെന്ന് ഗവേഷകന്‍ സ്റ്റീവ് ഗുഡ്മാന്‍ പറഞ്ഞു. കൊറോണവൈറസ് കാലങ്ങളായി വവ്വാലുകളുടെ ശരീരത്തിലുണ്ട്. ഇരുവരുടെയും വളര്‍ച്ച ഒരുമിച്ച് തന്നെയാണ് നടന്നതെന്ന് ചിക്കാഗോയിലെ ഫീല്‍ഡ് മ്യൂസിയത്തിലെ സ്റ്റീവ് ഗുഡ്മാന്‍ വ്യക്തമാക്കി. ഒരു വൈറസ് ശരീരത്തില്‍ എത്താന്‍ ആ ശരീരത്തിന്റെ ആവാസ വ്യവസ്ഥ വളരെ പ്രധാനമാണെന്നും സ്റ്റീവ് പറയുന്നു. എന്നാല്‍ വവ്വാലുകളുടെ ശരീരത്തില്‍ ഇത് അപകടകരമല്ലെന്ന് ഡോക്ടര്‍മാര്‍ പറഞ്ഞു. എന്നാല്‍ ഇത് മറ്റ് മൃഗങ്ങളില്‍ വലിയ പ്രശ്നങ്ങളുണ്ടാക്കുമെന്നും പഠനത്തില്‍ പറയുന്നു.
പലതരത്തിലുള്ള കൊറോണ വൈറസുകളുണ്ട്. ഈ വൈറസുകള്‍ വവ്വാലുകള്‍ക്ക് തീര്‍ത്തും നിരുപദ്രവകരമായിരിക്കെത്തന്നെ, അവയില്‍ നിന്ന് മറ്റു ജീവിവര്‍ഗ്ഗങ്ങളിലേക്ക് പകരാന്‍ ഇടയായാല്‍ അത് അവരെ വളരെ മാരകമായി ആക്രമിക്കാനുള്ള സാധ്യത നിലനില്‍ക്കുന്നുണ്ട് എന്ന് ഗവേഷകര്‍ മുന്നറിയിപ്പ് നല്‍കുന്നുണ്ട്. വുഹാനിലെ ഒരു വെറ്റ് മാര്‍ക്കറ്റില്‍ നിന്നാണ് കൊവിഡ് 19 മനുഷ്യരിലേക്ക് പകര്‍ന്നതെന്ന് റിപ്പോര്‍ട്ടുകള്‍ ഉണ്ടായിരുന്നു. വിവിധ തരത്തിലാണ് കൊറോണ വൈറസുകള്‍ പെരുമാറുക. ഇവയെല്ലാം വസിക്കുന്നത് വവ്വാലുകളുടെ ശരീരത്തിലാണ്. ഇതുവരെ ഇവയെല്ലാം മനുഷ്യ ശരീരത്തിലേക്ക് പ്രവേശിക്കുന്നതായോ പടരുന്നതായോ കണ്ടെത്തിയിട്ടില്ല. അതുകൊണ്ട് തന്നെ അപകടസാധ്യതയുണ്ടെന്ന് പറയാനാവില്ല.
സസ്യങ്ങളില്‍ പരാഗണം നടത്തുക, രോഗാണുക്കളെ വഹിക്കുന്ന പ്രാണികളെ ഭക്ഷിക്കുക, ഉഷ്ണമേഖലാവനങ്ങളിലെ മരങ്ങളുടെ വിത്തുകള്‍ വിതരണം ചെയ്യുക തുടങ്ങിയ പല ഉപകാരങ്ങളും വവ്വാലുകളെക്കൊണ്ടുണ്ടെങ്കിലും, അവര്‍ കൊറോണാവൈറസുകളുടെ സ്വാഭാവിക വാഹകര്‍ കൂടിയാണ് എന്നതും ഒരു യാഥാര്‍ത്ഥ്യമാണെന്നും പഠനത്തില്‍ പറയുന്നു.
