ന്യൂദല്‍ഹി: കൊറോണ(കൊവിഡ് 19) വൈറസ് പടര്‍ത്തുന്നുവെന്ന് ആരോപിച്ച് ദല്‍ഹിയിലെ സഫ്ദര്‍ജങ് ആശുപത്രിയിലെ രണ്ട് വനിതാ ഡോക്ടര്‍മാര്‍ക്ക് നേരെ ആക്രമണം. സംഭവവുമായി ബന്ധപ്പെട്ട് ഗൗതം നഗര്‍ നിവാസിയായ 44 കാരനെ പോലീസ് അറസ്റ്റ് ചെയ്തിട്ടുണ്ട്. ഇന്നലെ രാത്രി ഡോക്ടര്‍മാരെ ഗൗതം നഗറിലെ താമസ സ്ഥലത്ത് വച്ചാണ് ഇയാള്‍ ആക്രമിച്ചത്.
അതേസമയം രാജ്യത്ത് കൊറോണ ബാധിതരുടെ എണ്ണം 5,734 ആയി. കഴിഞ്ഞ 24 മണിക്കൂറിനിടെ 540 പുതിയ കേസുകളും 17 മരണങ്ങളുമാണ് റിപ്പോര്‍ട്ട് ചെയ്തത്. 166 പേരാണ് രാജ്യത്ത് കൊവിഡ് ബാധിച്ചതായി ഇതുവരെ മരിച്ചത്. ദല്‍ഹി കാന്‍സര്‍ ആശുപത്രിയില്‍ ഡോക്ടര്‍ക്കും നഴ്‌സിനും ഉള്‍പ്പെടെ മൂന്നുപേര്‍ക്കുകൂടി കൊവിഡ് സ്ഥിരീകരിച്ചു. 473 പേര്‍ രോഗമുക്തരായെന്ന് കേന്ദ്ര ആരോഗ്യ മന്ത്രാലയം അറിയിച്ചു. ഇന്നലെ മാത്രം 93 പേര്‍ക്ക് രോഗം സ്ഥിരീകരിച്ച ദല്‍ഹിയില്‍ 20 കൊവിഡ് വ്യാപന മേഖലകള്‍ സീല്‍ ചെയ്തു.
