ബീജിങ്: കൊറോണ വൈറസ് എന്ന മഹാമാരിയുടെ പ്രഭവ കേന്ദ്രമായ ചൈനയിലെ വുഹാന് നഗരത്തിലെ ലോക്ക്ഡൗണ് പൂര്ണമായും പിന്വലിച്ചു. പുതുതായി രോഗം ബാധിക്കുന്നവരുടെ എണ്ണം വളരെ കുറഞ്ഞതോടെയാണ് പൊതു ജീവിതം സാധാരണ നിലയിലാക്കാന് ചൈന തീരുമാനമെടുത്തത്. ഹുബായ് പ്രവിശ്യയിലെ ഏറ്റവും പ്രസിദ്ധമായ വിദ്യാഭ്യാസ കേന്ദ്രവും തിരക്കേറിയ നഗരവുമാണ് വുഹാന്.
ഒരു കോടിയിലേറെ താമസക്കാരുള്ള വുഹാനിലെ ജനങ്ങള്ക്ക് ഇന്നുമുതല് യാത്രാവിലക്കുകളില്ല. പതിനൊന്നാഴ്ചകള്ക്ക് ശേഷമാണ് വുഹാന് നഗരം സാധാരണ ജീവിതത്തിലേക്ക് തിരിച്ചുവരുന്നത്. യാത്രാ ഗതാഗതം പുന:സ്ഥാ പിക്കുന്നതിന്റെ ആദ്യഘട്ടമെന്ന നിലയില് വുഹാനില് നിന്നുള്ള ആദ്യ തീവണ്ടി പുറപ്പെട്ടതായും അന്താരാഷ്ട്രമാദ്ധ്യമങ്ങള് റിപ്പോര്ട്ട് ചെയ്യുന്നു. അതേസമയം എല്ലാവരുടേയും ആരോഗ്യം നിരീക്ഷിക്കാന് ആരോഗ്യവകുപ്പിന്റെ പ്രത്യേക സംവിധാനം ആപ്പ് വഴി ഫോണുകളില് ലഭ്യമാണ്. ഇത് നിര്ബന്ധമായും ഉപയോഗിക്കാനാണ് നിര്ദ്ദേശിച്ചിരിക്കുന്നത്. ആളുകള് മറ്റുള്ളവരുമായി ബന്ധപ്പെടുന്നത് ട്രാക്ക് ചെയ്യാനുള്ള തരത്തിലാണ് സംവിധാനം ഒരുക്കിയിരിക്കുന്നത്.
കൊറോണ വ്യാപനം ശക്തമായതോടെ രണ്ടുദിവസത്തിനകം വുഹാന് നഗരം അടച്ചു പൂട്ടിയാണ് ചൈന പ്രതിരോധപ്രവര്ത്തനത്തിന് തുടക്കം കുറിച്ചത്. വൈറസ് രോഗചികിത്സകരായ പ്രമുഖ ഡോക്ടര്മാരേയും മറ്റ് ആരോഗ്യ രക്ഷാ പ്രവര്ത്തകരേയും വുഹാനില് എത്തിച്ചാണ് ചൈന ഡിസംബര് 31 മുതല് കൊറോണക്കെതിരെ പോരാടിയത്.
