ചാലക്കുടി: ഷാര്ജയില് ക്വാറന്റീന് നിര്ദ്ദേശിക്കപ്പെട്ടിട്ടും വിമാനത്തിലും കെഎസ്ആര്ടിസിയിലും യാത്ര ചെയ്തവരെ ചാലക്കുടിയില് വച്ച് നാട്ടുകാര് തടഞ്ഞു. ഇവരുടെ കൈകയില് പതിച്ചിരുന്ന ‘ഹോം ക്വാറന്റീന് മുദ്ര’യാണ് തിരിച്ചറിയാന് സഹായകമായത്.
ഷാര്ജയില് നിന്ന് ബെംഗളൂരുവിലും തുടര്ന്ന് നെടുമ്പാശേരിയിലും വിമാന മാര്ഗം സഞ്ചരിച്ച ഇവര് അങ്കമാലിയില് നിന്ന് തൃശൂരിലേക്ക് കെഎസ്ആര്ടിസിയില് യാത്ര ചെയ്യുമ്പോള് ചാലക്കുടിയില് വച്ച് ബസ് തടയുകയായിരുന്നു.
നെടുമ്പാശേരിയില് നിന്ന് ഇവരെ പ്രത്യേക വാഹനത്തിലായിരുന്നു അധികൃതര് അയച്ചതെങ്കിലും വഴിമദ്ധ്യേ ഇറങ്ങി ഇവര് കെഎസ്ആര്ടിസിയില് കയറുകയായിരുന്നു. തുടര്ന്ന് ബസ് ചാലക്കുടി ബസ് സ്റ്റാന്റിലെത്തിയപ്പോള് ഇവരുടെ കൈയിലെ മുദ്ര കണ്ട് മറ്റ് യാത്രക്കാര് വിവരം അധികൃതരെ അറിയിക്കുകയായിരുന്നു.
