സോള്: ദക്ഷിണ കൊറിയയില് ഒറ്റ ദിവസത്തിനുള്ളില് കൊറോണബാധിതരുടെ എണ്ണത്തില് വന് വര്ധന. ഇന്നലെ 309 പേര്ക്ക് കൂടി സ്ഥിരീകരിച്ചതോടെ ദ. കൊറിയയിലെ ആകെ രോഗികളുടെ എണ്ണം 6593 ആയി. ഡെയ്ഗുവിലെ ഷിന്ഷിയോന്ജി മത വിഭാഗം നടത്തിയ രോഗശാന്തി ശുശ്രൂഷയില് പങ്കെടുത്തവരില് നിന്നാണ് 60 ശതമാനം പേര്ക്കും രോഗം ബാധിച്ചത്. ഷിന്ഷിയോന്ജി സഭ കൊറോണ പ്രതിരോധ പ്രവര്ത്തനങ്ങള്ക്കായി നല്കിയ തുക ദക്ഷിണ കൊറിയ നിരസിച്ചു. വൈറസ് ബാധ അനിയന്ത്രിതമായി തുടരുന്ന സാഹചര്യത്തില് ദക്ഷിണ കൊറിയയില് നിന്നുള്ളവര്ക്ക് യാത്രാ വിലക്കേര്പ്പെടുത്താനുള്ള ജപ്പാന്റെ തീരുമാനത്തില് കൊറിയന് വിദേശകാര്യമന്ത്രി ശക്തമായ അതൃപ്തി രേഖപ്പെടുത്തി.
യൂറോപ്പില് ഏറ്റവുമധികം പേര്ക്ക് കൊറോണ സ്ഥിരീകരിച്ച ഇറ്റലിയില് ആകെ രോഗികള് 3800 ആയി. 150 പേര് മരിച്ചു. ഇന്ത്യക്കാരടക്കം ഇറ്റലിയില് നിന്ന് രോഗം ബാധിച്ചത് ഇരുപത്തിയേഴോളം രാജ്യക്കാര്ക്കാണ്. വത്തിക്കാനിലും ആദ്യ കൊറോണ ബാധ സ്ഥിരീകരിച്ചു. മാര്പ്പാപ്പയ്ക്ക് വൈറസ് ബാധയില്ലെന്ന പരിശോധനാഫലത്തിന് പിന്നാലെയാണ് വത്തിക്കാനില് രോഗം സ്ഥിരീകരിച്ചത്. റോമിലെ അതിരൂപത എല്ലാ വേദപഠനക്ലാസുകളും ധ്യാനങ്ങളും നിര്ത്തിവച്ചതായി അറിയിച്ചു.
അമേരിക്കയില് വൈറസ് ബാധിതരുടെ എണ്ണം 228 ആയി. മരണം 14. ന്യൂയോര്ക്കില് ജൂത മതാധ്യാപകന് കൊറോണ സ്ഥിരീകരിച്ചതിനെ തുടര്ന്ന് മുഴുവന് വിദ്യാര്ഥികളെയും നിരീക്ഷണത്തിലാക്കി. കാലിഫോര്ണിയയിലെ കടലോര മേഖലകളില് രോഗം പിടിമുറുക്കുന്ന സാഹചര്യത്തില് അവിടെ നിന്നുള്ള ജീവനക്കാര്ക്ക് വീട്ടിലിരുന്ന് ജോലി ചെയ്യാന് ഗൂഗിള് അനുവാദം നല്കി.
ചൈനയില് ഇന്നലെ വരെയുള്ള കൊറോണ മരണനിരക്ക് 3042 ആയി. 80,552 പേര്ക്ക് രോഗം സ്ഥിരീകരിച്ചു. 5737 പേര് അതീവ ഗുരുതരാവസ്ഥയില് തുടരുന്നു. ചൈനയില് വന്യ മൃഗ വില്പ്പനശാലയാണ് കൊറോണ വൈറസ് പ്രഭവ കേന്ദ്രമെന്നതിനാല് വന്യമൃഗങ്ങളുടെ വില്പ്പന ചൈന നിയമവിരുദ്ധമാക്കി.
ഇറാനില് പരിശോധനാഫലങ്ങള് വൈകുന്നതിനാല് മൃതദേഹങ്ങള് മോര്ച്ചറികളില് കുന്നുകൂടിയിരിക്കുകയാണ്. ഇസ്ലാമിക മതാചാരപ്രകാരമുള്ള ശവസംസ്കാര ചടങ്ങുകളും കൊറോണ ബാധ ഭയന്ന് പലരും വേണ്ടെന്ന് വച്ചു.
വളര്ത്തുനായയ്ക്ക് കൊറോണ; പകര്ന്നത് മനുഷ്യനില് നിന്ന്
ഹോങ്കോങ്: വൈറസ് ബാധിച്ച് ചികിത്സയില് കഴിയുന്നയാളുടെ വളര്ത്തുനായയ്ക്കും കൊറോണ സ്ഥിരീകരിച്ചു. ഹോങ്കോങ്ങിലാണ് സംഭവം. മനുഷ്യനില് നിന്ന് മൃഗത്തിലേക്ക് കൊറോണ പടര്ന്നതായി ആദ്യമായാണ് റിപ്പോര്ട്ട് ചെയ്യുന്നത്.
പൊമറേനിയന് ഇനത്തില് പെട്ട നായയ്ക്കാണ് നേരിയതോതില് വൈറസ് ബാധിച്ചത്. നായ പ്രത്യേക നിരീക്ഷണത്തിലാണ്. ഹോങ്കോങ് സര്വകലാശാലയുടെയും ലോകമൃഗാരോഗ്യ സംഘടനയുടെയും പ്രതിനിധികള് സംഭവം വിലയിരുത്തി. പരിശോധനാ ഫലം നെഗറ്റീവാകും വരെ നായയെ പുറത്തുവിടില്ലെന്നും അധികൃതര് അറിയിച്ചിട്ടുണ്ട്.
