തിരുവനന്തപുരം: ആയുര്‍വേദ ഔഷധ രംഗത്തെ അസംസ്‌കൃത വസ്തുക്കളുടെ ദൗര്‍ലഭ്യം പരിഹരിക്കാന്‍ സംസ്ഥാനത്തുടനീളം ആയുര്‍വേദ ഔഷധ സസ്യ കൃഷി വ്യാപിപ്പിക്കാന്‍ തീരുമാനം. ആയുഷ് വകുപ്പിലേയും കൃഷി വകുപ്പിലേയും ഔഷധ സസ്യകൃഷിക്ക് ലഭ്യമായ ഫണ്ട് ഉപയോഗിച്ചാണ് ഇത് സാധ്യമാക്കുക.
ഇത്തരത്തില്‍ ഉത്പ്പാദിപ്പിക്കുന്ന അസംസ്‌കൃത ഔഷധങ്ങള്‍ പൊതു, സഹകരണ, സ്വകാര്യ മേഖലയിലെ ഔഷധ നിര്‍മ്മാതാക്കള്‍ ‘ബൈ ബാക്ക്’ സംവിധാനത്തിലൂടെ കര്‍ഷകര്‍ക്ക് ലഭിക്കേണ്ട ന്യായവില ഉറപ്പുവരുത്തി ശേഖരിക്കുന്നു. ഇതിലൂടെ ഈ മേഖലയിലെ ഔഷധസസ്യ ദൗര്‍ലഭ്യം പരിഹരിക്കാന്‍ സാധിക്കും. ഔഷധ സസ്യ വിപുലീകരണവുമായി ബന്ധപ്പെട്ട് തുടര്‍ പ്രവര്‍ത്തനങ്ങള്‍ ആസൂത്രണം ചെയ്യുന്നതിന് ആരോഗ്യ വകുപ്പ് മന്ത്രി കെ.കെ. ശൈലജ, കൃഷി വകുപ്പ് മന്ത്രി വി.കെ. സുനില്‍കുമാര്‍ എന്നിവരുടെ നേതൃത്വത്തില്‍ ചേര്‍ന്ന യോഗത്തിലാണ് തീരുമാനമെടുത്തത്.
കേരളത്തില്‍ ആയുര്‍വേദ ഔഷധ നിര്‍മ്മാണ മേഖലയിലെ അസംസ്‌കൃത വസ്തുക്കളായ ഔഷധ സസ്യങ്ങളുടെ ദൗര്‍ലഭ്യം നേരിടുന്നുണ്ടെന്നും അത് പരിഹരിക്കുന്നതിന് കൃത്യമായ ആസൂത്രണത്തോടെ ഔഷധ സസ്യ കൃഷി ആരംഭിക്കണമെന്നും യോഗം തീരുമാനിച്ചു. സര്‍ക്കാരിന്റെ വിവിധ വകുപ്പുകളില്‍ ലഭ്യമായ ഭൂമി ഇതിനായി ഉപയോഗപ്പെടുത്തും. ഹ്രസ്വകാല വിളകളും ദീര്‍ഘകാല വിളകളും ഒരു പോലെ പ്രോത്സാഹിപ്പിക്കുന്നതിനോടൊപ്പം ഇടവിളയായി ഔഷധ സസ്യ കൃഷി നടത്തുന്നതും പരിഗണിക്കും. വിവിധ വകുപ്പുകളെ സംയോജിപ്പിച്ചുകൊണ്ട് വിശദമായ കര്‍മ്മപദ്ധതി തയ്യാറാക്കി അടിയന്തരമായി നടപ്പിലാക്കുന്നതിന് കമ്മിറ്റിയും രൂപീകരിച്ചു.
ആയുഷ് വകുപ്പ് സെക്രട്ടറി ഡോ. ഷര്‍മ്മിള മേരി ജോസഫ്, കൃഷി വകുപ്പ് സെക്രട്ടറി ഡോ. രത്തന്‍ ഖേല്‍ക്കര്‍, നാഷണല്‍ ആയുഷ് മിഷന്‍ ഡയറക്ടര്‍ ഡോ. നവജ്യോത് ഖോസ, കൃഷി വകുപ്പ് ഡയറക്ടര്‍ ഡോ. കെ. വാസുകി, ഫോറസ്റ്റ് ചീഫ് കണ്‍സര്‍വേറ്റര്‍ പത്മ മൊഹന്ദി എന്നിവര്‍ യോഗത്തില്‍ പങ്കെടുത്തു.
