കോഴിക്കോട്: സിംസ് പദ്ധതിയുടെ കരാര് രഹസ്യമാക്കി വെച്ചാണ് ടെന്ഡര് നടപടികള് പൂര്ത്തിയാക്കിയതായി ആരോപണം. കോഴിക്കോട് കേന്ദ്രീകരിച്ച് പ്രവര്ത്തിക്കുന്ന സ്വകാര്യ ഐടി കമ്പനിയായ ഇസി ടെക്നോളജീസാണ് ആരോപണവുമായി രംഗത്ത് എത്തിയിരിക്കുന്നത്. ടെന്ഡര് നടപടികള് മറച്ചുവെച്ചാണ് കെല്ട്രോണ് ഗാലക്സണിന് കരാര് കൈമാറിയതെന്നും ഇതില് ആരോപിക്കുന്നുണ്ട്.
കൂടാതെ ഉപഭോക്താക്കളില് നിന്ന് പണം ഈടാക്കാതെ നടപ്പാക്കാവുന്ന പദ്ധതിയാണ് വന് തുകയ്ക്ക് ഗാലക്സണിന് നല്കിയതെന്ന് ഇസി ടെക്നോളജീസ് ആരോപിച്ചു. 2015ലാണ് ഇസി ടെക്നോളജീസ് ഇലക്ട്രോണിക് സെക്യൂരിറ്റി മോണിറ്ററിങ് ഓവര് സബ്സ്ക്രിപ്ഷന് അഥവാ എസ്മോസ് എന്ന പദ്ധതി തുടങ്ങിയത്. സിസിടിവി അടക്കമുള്ള ഉപകരണങ്ങള് സൗജന്യമായി സ്ഥാപിക്കുകയും നിരീക്ഷണത്തിനുളള ചാര്ജ്ജ് മാത്രം ഉപഭോക്താക്കളില് നിന്ന് ഈടാക്കുന്നതുമായിരുന്നു പദ്ധതി.
ഈ കാലഘട്ടത്തില് തന്നെയാണ് സമാനമായ ടെക്നോളജിയുമായി ഗാലക്സണ് രംഗത്തെത്തുന്നത്. ടെന്ഡര് നടപടികള് മറച്ചുവച്ചതിനാല് മറ്റൊരു കമ്പനിക്കും ടെന്ഡറില് പങ്കെടുക്കാന് കഴിഞ്ഞില്ല. വിവാദമുയര്ന്ന സാഹചര്യത്തില് പദ്ധതി റീ ടെന്ഡണ്ടര് ചെയ്യണമെന്നും ഇസി ടെക്നോളജീസ് ആവശ്യപ്പെട്ടു.
അതേസമയം ഇസി ടെക്നോളജീസ് ഉയര്ത്തുന്ന വാദങ്ങള് തെറ്റാണെന്ന് കെല്ട്രോണ് അറിയിച്ചു. സംസ്ഥാന സര്ക്കാരിന്റെ ഇ ടെന്ഡര് സൈറ്റില് മൂന്ന് വട്ടവും പ്രമുഖ ദിനപത്രത്തില് ഒരു വട്ടവും പരസ്യം നല്കിയിരുന്നുവെന്നാണ് കെല്ട്രോണ് പറയുന്നത്. മൂന്നു ടെന്ഡറിലും ഗാലക്സണ് മാത്രമാണ് പങ്കെടുത്തത്.
സിംസ് പദ്ധതിയില് ഗാലക്സണിന് മുന്പരിചയമില്ലെങ്കിലും മാതൃകമ്പനിയായ വിഓ സ്റ്റോക് എല്എല്സിയുടെ പ്രവൃത്തിപരിചയമാണ് പരിഗണിച്ചത്. നാലാമത്തെ ടെന്ഡറില് മീഡിയ ട്രോണിക്സ് എന്ന കമ്പനിയും പങ്കെടുത്തെങ്കിലും പ്രവൃത്തിപരിചയമില്ലാത്തതിനാല് ഒഴിവാക്കുകയായിരുന്നെന്നും കെല്ട്രോണ് അറിയിച്ചു.
