തിരുവനന്തപുരം: സ്വന്തം ഭൂമിയില് നിന്നും മണ്ണ് കടത്തുന്നത് തടഞ്ഞ സ്ഥലം ഉടമയെ ജെസിബി കൊണ്ട് അടിച്ചുകൊന്നു. കാട്ടക്കട അമ്പലത്തിന്കാല കാഞ്ഞിരവിളയില് ഇന്ന് പുലര്ച്ചെയാണ് സംഭവം നടക്കുന്നത്. സ്വന്തം സ്ഥലത്തെ മണ്ണെടുപ്പ് ചോദ്യം ചെയ്ത സംഗീത് എന്നയാളെ ഗുണ്ടാ സംഘം ക്രൂരമായി കൊലപ്പെടുത്തുകയായിരുന്നു.
സംഗീതിന്റെ പുരയിടത്തില് നിന്നും നിന്നും ഇന്നലെ രാത്രിയോടെ ചാരുപാറ സ്വദേശി സജുവിന്റെ നേതൃത്വത്തിലുള്ള സംഘം മണ്ണ് കടത്തുകയായിരുന്നു. ജെസിബിയുമായി എത്തിയ സംഘം മണ്ണ് കൊണ്ടു പോകുന്നത് ശ്രദ്ധയില് പെടുകയും സംഗീത് ഇത് ചോദ്യം ചെയ്യുകയും തന്റെ കാര് കൊണ്ട് ജെസിബിയുടെ വഴി തടയുകയും ചെയ്തു.
തുടര്ന്ന് സംഗീതിന്റെ വീടിനോട് ചേര്ന്നുള്ള മതില് പൊളിച്ച് ആ വഴി പുറത്തു കടക്കാനായിരുന്നു മണ്ണു കടത്ത് സംഘത്തിന്റെ ശ്രമം. ഇതു തടയാന് വേണ്ടി സംഗീത് കാറില് നിന്നും ചാടിയിറങ്ങി ജെസിബിയുടെ മുന്നില് നിന്നു. അപ്പോള് ജെസിബിയുടെ മണ്ണ് മാന്തുന്ന ഭാഗം കൊണ്ട് സംഗീതിനെ അടിച്ചുകൊല്ലുകയായിരുന്നു. ജെസിബിയുടെ അടിയേറ്റ് വീണ സംഗീതിനെ നാട്ടുകാര് ചേര്ന്ന് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
അതേസമയം പ്രദേശത്ത് നിന്നും സ്ഥിരമായി മണ്ണ് കടത്തുന്നയാളാണ് ചാരുപാറ സ്വദേശി സജുവെന്നും സംഭവ ശേഷം രക്ഷപ്പെട്ട ഇയാള് ഒളിവിലാണെന്നും പോലീസ് അറിയിച്ചു. അടിയേറ്റ് വീണ സംഗീതിന് ശ്വാസതടസ്സമുണ്ടായെന്ന് ദൃക്സാക്ഷികള് പറയുന്നു. മണ്ണുമാന്തി സംഘത്തില് നാലഞ്ച് പേരുണ്ടായിരുന്നു. ഇവര് വന്ന ബൈക്കുകള് നാട്ടുകള് പിടിച്ചു വച്ചിട്ടുണ്ട്. അനധികൃത മണ്ണു കടത്തിനെ ചൊല്ലി നേരത്തേയും പ്രദേശത്ത് തര്ക്കങ്ങളും കേസുകളും ഉണ്ടായിട്ടുണ്ടെന്ന് സ്ഥലം കൗണ്സിലര് സുനില് അറിയിച്ചു.
സജു ഉള്പ്പെടെ കണ്ടാലറിയാവുന്ന നാല് പേര്ക്കെതിരെ കേസെടുത്ത് അന്വേഷണം ആരംഭിച്ചിട്ടുണ്ട്. കാട്ടാക്കട ഭാഗത്തെ മണ്ണുക്കടത്തുകാരില് പ്രധാനിയാണ് സജുവെന്ന് നാട്ടുകാര് പറയുന്നു. സജുവടക്കം നാല് പേരെ പ്രതികളാക്കി പോലീസ് കേസെടുത്തിട്ടുണ്ട്. പ്രവാസിയായിരുന്ന സംഗീത് ഇപ്പോള് നാട്ടില് ചിക്കന് സ്റ്റാളുകളും മറ്റു നടത്തിയാണ് ജീവിക്കുന്നത്. വീടിനോട് ചേര്ന്നുള്ള വിശാലമായ പുരയിടത്തില് നിന്നും മണ്ണെടുക്കാന് വനംവകുപ്പിന് സംഗീത് അനുമതി നല്കിയിരുന്നു. ഇതിന്റെ അടിസ്ഥാനത്തില് മണ്ണ് കടത്താനുള്ള ശ്രമമായിരുന്നു.
