കോഴിക്കോട്: കേന്ദ്ര ഗവണ്മെന്റ് നടപ്പാക്കിയ പൗരത്വ നിയമഭേദഗതിക്കെതിരെ എല്ഡിഎഫ് നടത്തുന്ന മനുഷ്യ ശൃംഖലയ്ക്ക് പിന്തുണയുമായി പിഡിപി. ഈ സമരത്തില് എല്ഡിഎഫിനൊപ്പം തങ്ങളും അണിചേരുമെന്നാണു അധികൃതര് വാര്ത്താ സമ്മേളനത്തില് അറിയിച്ചത്. എന്നാല്, സിപിഎം ഇതിനോട് പ്രതികരിച്ചിട്ടില്ല. ഇതോടൊപ്പം പൗരത്വ നിയമ ഭേദഗതിക്കെതിരെയുള്ള സമരം എന്നതരത്തില് ജനുവരി 30 ന് പിഡിപിയുടെ നേതൃത്വത്തില് കരിപ്പൂര് അന്താരാഷ്ട്ര വിമാനത്താവളം ഉപരോധിക്കുമെന്ന് പിഡിപി നേതൃത്വം അറിയിച്ചിട്ടുണ്ടായിരുന്നു. കരിപ്പൂര് കൂടാതെ മൂന്ന് വിമാനത്താവളങ്ങള് കൂടി തങ്ങള് ഉപരോധിക്കുന്നുണ്ടെന്നും അവര് വ്യക്തമാക്കി.
സിപിഎം നടത്തുന്ന മനുഷ്യ ശൃംഖല എന്ന പരിപാടി നടക്കുന്നതിനാല് നഗരസഭാ സംവിധാനങ്ങള് അതിനുവേണ്ടി ഉപയോഗിച്ച് പരിപാടിയില് ആളെക്കൂട്ടാനുള്ള ശ്രമം നടക്കുന്നെന്ന് ആരോപണം ശക്തമാണ്. പാര്ട്ടി പരിപാടി നടക്കുന്ന ദിവസം വാര്ഡ്സഭ വിളിക്കരുതെന്ന തലശ്ശേരി നഗരസഭാ ചെയര്മാന്റെ ഉത്തരവ് വന്നിരുന്നു. ഇതിനെതിരെ ബിജെപി തലശ്ശേരി നിയോജക മണ്ഡലം കമ്മറ്റി പ്രതിഷേധിച്ചു. തലശ്ശേരി നഗരസഭയുടെ വാര്ഷിക പദ്ധതി രൂപീകരണത്തിന്റെ ഭാഗമായി എല്ലാ വാര്ഡുകളിലും വാര്ഡ് സഭകള് വിളിച്ച് ചേര്ക്കാന് നിശ്ചയിച്ചിരുന്നു. എന്നാല് 26ന് നിശ്ചയിക്കപ്പെട്ട വാര്ഡ് സഭകള് നടത്താന് പാടില്ലെന്നും നടന്നാല് യോഗ തീരുമാനങ്ങള് അംഗീകരിക്കില്ലെന്നുമാണ് ചെയര്മാന്റെ ഭീഷണി. വനിതാമതിലിന്റെ പേരില് കുടുംബശ്രീ അംഗങ്ങളെയും ആശാവര്ക്കര്മാരുള്പ്പടെയുള്ള ഉദ്യോഗസ്ഥരെയും തെറ്റിദ്ധരിപ്പിച്ചും ഭീഷണിപ്പെടുത്തിയും പങ്കെടുപ്പിക്കാന് ശ്രമിച്ചതിന് സമാനമായ പ്രവര്ത്തിയാണ് ഇപ്പോഴും ചെയ്യുന്നത്.
രാഘവന് മാസ്റ്ററുടെ പ്രതിമ നിര്മ്മാണം മുതലുള്ള അഴിമതികളും സ്വജനപക്ഷപാത നിലപാടുകളും ഉള്ള ചെയര്മാനും സ്റ്റാന്റിംഗ് കമ്മറ്റി അധ്യക്ഷന്മാരും നഗരസഭയെ സിപിഎം ഓഫീസാക്കി മാറ്റുകയാണന്ന് യോഗം കുറ്റപ്പെടുത്തി. ദേശവിരുദ്ധ പ്രക്ഷോഭങ്ങള് നടത്താന് നഗരസഭയെ ഉപയോഗിക്കുന്നതിനെതിരെ യോഗം പ്രതിഷേധിച്ചു.
