തിരുവനന്തപുരം: പൗരത്വ ഭേദഗതി നിയമത്തിനെതിരായ പരാമര്ശങ്ങളുണ്ടെങ്കില് ഭരണഘടനാപരമായ നടപടി സ്വീകരിക്കുമെന്ന് ഗവര്ണര് ആരിഫ് മുഹമ്മദ് ഖാന്. പൗരത്വ നിയമ ഭേദഗതിക്ക് എതിരെ സമരം ചെയ്യുന്ന ആരും ചര്ച്ചയ്ക്കു തയാറാവുന്നില്ലെന്നും ഗവര്ണര് മാധ്യമങ്ങളോട് പറഞ്ഞു.
നിയമത്തെ എതിര്ക്കാന് ആര്ക്കും സ്വാതന്ത്ര്യമുണ്ട്. ആ അഭിപ്രായത്തെ മാനിക്കുന്നു. എന്നാല് നടപടികള് ചട്ടത്തിനും നിയമത്തിനും അനുസരിച്ചായിരിക്കണം. നിയമത്തിനു മുകളിലാണ് താന് എന്ന് ആരെങ്കിലും കരുതിയാല് അംഗീകരിക്കാനാവില്ല. അഭിപ്രായ വ്യത്യാസങ്ങള് ജനാധിപത്യത്തില് സ്വാഭാവികമാണ്. അതു ചര്ച്ചയിലൂടെയാണ് പരിഹരിക്കേണ്ടത്. എന്നാല് അത്തരം ചര്ച്ചകള്ക്ക് ആരും എത്തുന്നില്ല. നയപ്രഖ്യാപന പ്രസംഗത്തിന്റെ കരട് താന് കണ്ടിട്ടില്ലെന്നും അദ്ദേഹം പറഞ്ഞു.
കേന്ദ്രവുമായുള്ള അഭിപ്രായ ഭിന്നതകള് ഗവര്ണ്ണറെ അറിയിക്കണം. കോടതിയുമായി ബന്ധപ്പെട്ട കാര്യങ്ങളും അറിയിക്കണമെന്നും ഗവര്ണ്ണര് ചൂണ്ടിക്കാട്ടി. പൗരത്വ നിയമത്തിന് എതിരെ നിയമസഭ പ്രമേയം പാസാക്കിയതിലും സര്ക്കാര് സുപ്രീം കോടതിയില് പോയതിലും തന്റെ അഭിപ്രായങ്ങളില് മാറ്റമില്ലെന്നും ഗവര്ണര് തുറന്നടിച്ചു.
