ന്യൂദല്ഹി: ഇന്ത്യന് കൗണ്സില് ഫോര് ചൈല്ഡ് വെല്ഫെയര് ഏര്പ്പെടുത്തിയ 2019ലെ ദേശീയ ധീരതാ പുരസ്കാരത്തിന് 12 സംസ്ഥാനങ്ങളില് നിന്നുള്ള 22 മിടുക്കരായ കുരുന്നുകള് അര്ഹരായി. പത്ത് പെണ്കുട്ടികള്ക്കും 12 ആണ്കുട്ടികള്ക്കുമാണ് നേട്ടം. മൂന്ന് പേര് മലയാളികളാണ്. കോഴിക്കോട് സ്വദേശികളായ ആദിത്യ കെ., മുഹമ്മദ് മുഹ്സിന്, ഫതാഹ് എന്നിവര്ക്കാണ് പുരസ്കാരം.
രാമനാട്ടുകര സ്വദേശിയായ ആദിത്യ കെ. ധീരതാ പുരസ്കാരങ്ങളില് ഏറ്റവും പ്രധാനപ്പെട്ട ഭാരത് പുരസ്കാരം നേടുന്ന ആദ്യ മലയാളിയാണ്. മരണാനന്തര ബഹുമതിയായ അഭിമന്യു പുരസ്കാരത്തിനാണ് മുഹമ്മദ് മുഹ്സിന് അര്ഹനായത്.
നേപ്പാളില് വച്ച് താന് സഞ്ചരിച്ചുകൊണ്ടിരുന്ന ബസ്സിന് തീപിടിച്ചപ്പോള് പതിനഞ്ചുകാരനായ ആദിത്യ അതിസാഹസികമായി രക്ഷിച്ചത് 40 പേരുടെ ജീവനാണ്. ബസ്സിന് തീപിടിച്ചെന്ന് അറിഞ്ഞ ഉടന് ഡ്രൈവര് സ്ഥലത്ത് നിന്ന് രക്ഷപ്പെട്ടു. യാത്രക്കാര് വാഹനത്തിലകപ്പെട്ടു. ഇതോടെ സമയോചിതമായ ഇടപെടലിലൂടെ കൈയില് കിട്ടിയ ചുറ്റിക കൊണ്ട് ആദിത്യ പുറകു വശത്തെ വാതില് തകര്ത്ത് മുഴുവന് പേരെയും പുറത്തെത്തിച്ചു. നിമിഷങ്ങള്ക്കകം ബസ് പൂര്ണമായി കത്തി നശിക്കുകയും ചെയ്തു. ഭാവിയില് ഒരു സൈനികനാകുകയാണ് ലക്ഷ്യമെന്ന് ആദിത്യ പറഞ്ഞു.
കോഴിക്കോട് സ്വദേശിയായ പതിനാറുകാരന് മുഹമ്മദ് മുഹ്സിനാണ് ധീരതാ പുരസ്കാരം നേടിയ മറ്റൊരു മലയാളി. കടലില് മുങ്ങിത്താഴുകയായിരുന്ന മൂന്ന് കൂട്ടുകാരെ സ്വന്തം ജീവന് ബലികൊടുത്ത്് രക്ഷിച്ചതിനാണ് മുഹ്സിനെ മരണാനന്തര ബഹുമതി നല്കി ആദരിച്ചത്. തന്റെ മകന്റേത് ധീരമായ മരണമാണെന്നും അവന് മറ്റുകുട്ടികള്ക്ക് മാതൃകയാണെന്നും മുഹ്സിന്റെ അച്ഛന് പറഞ്ഞു.
ട്രെയിന് മുന്നില് നിന്ന് സ്ത്രീയെയും അവരുടെ കുഞ്ഞിനെയും രക്ഷിച്ചതിനാണ് ഒമ്പതാം ക്ലാസ് വിദ്യാര്ഥിയായ വടകരക്കാരന് ഫതാഹ് പുരസ്കാരത്തിന് അര്ഹനായത്. നാല് വയസ്സുകാരനായ അനുജനെ പുലിയുടെ കൈയില് നിന്ന് രക്ഷിച്ച ഉത്തരാഖണ്ഡ് സ്വദേശിയായ പത്ത് വയസ്സുകാരി രാഖിക്കാണ് മാര്ക്കണ്ഡേയ പുരസ്കാരം. പുരസ്കാരങ്ങള് റിപ്പബ്ലിക് ദിനത്തില് പ്രധാനമന്ത്രി നരേന്ദ്ര മോദി വിതരണം ചെയ്യും.
