തിരുവനന്തപുരം : സിപിഎം കമ്മിറ്റി അംഗങ്ങളുടെ പ്രായപരിധി 75 ആക്കി നിശ്ചയിച്ചു. സംസ്ഥാനത്തെ മുഖ്യമന്ത്രി ഉള്‍പ്പടെയുള്ള നേതാക്കള്‍ക്കും തിരിച്ചടിയായാണ് പ്രായപരിധി കുറച്ചുകൊണ്ടുള്ള തീരുമാനം പുറത്തുവരുന്നത്. നിലവില്‍ ഇത് 80 ആണ്. പുതിയ പ്രായപരിധി വന്നാല്‍ ഒട്ടേറെ സംസ്ഥാനകമ്മിറ്റി അംഗങ്ങള്‍ അടുത്ത സമ്മേളനത്തോടെ പുറത്താകും.
കേരളത്തില്‍ നിന്നുള്ള എസ്. രാമചന്ദ്രന്‍ പിള്ള, പി. കരുണാകരന്‍, വൈക്കം വിശ്വന്‍ എന്നിവരും കേന്ദ്രകമ്മിറ്റിയില്‍ നിന്ന് ഒഴിവാകും. എസ്. രാമചന്ദ്രന്‍പിള്ള 80 പിന്നിട്ടെങ്കിലും കഴിഞ്ഞ പാര്‍ട്ടി കോണ്‍ഗ്രസില്‍ ഇളവ് നല്‍കി പിബിയില്‍ നിലനിര്‍ത്തുകയായിരുന്നു.
കേന്ദ്രകമ്മിറ്റി, പൊളിറ്റ്ബ്യൂറോ എന്നിവയില് അംഗങ്ങള്‍ക്കുള്ള പ്രായപരിധി 75 മതിയെന്നാണ് ഇപ്പോള്‍ തത്വത്തില്‍ തീരുമാനിച്ചിരിക്കുന്നത്. ഇത് സംസ്ഥാന കമ്മിറ്റികളേയും ബാധിക്കും. സംസ്ഥാനകമ്മിറ്റിയുടെ പ്രായ പരിധി ഇതിലും കുറയ്‌ക്കാനാണ് തീരുമാനിച്ചിട്ടുള്ളത്. പുതുതായി സംസ്ഥാന കമ്മിറ്റിയില്‍ ഉള്‍പ്പെടുത്തുന്നവരുടെ പ്രായപരിധി 65 ആക്കുക എന്ന നിര്‍ദേശമാണ് കേരളത്തില്‍ പരിഗണിക്കപ്പെടുന്നത്. സംസ്ഥാന കമ്മിറ്റിയില്‍ കോലിയക്കോട് കൃഷ്ണന്‍ നായര്‍, ആനത്തലവട്ടം ആനന്ദന്‍ തുടങ്ങി 75 പിന്നിട്ട ഒട്ടേറെ പേരുണ്ട്.
പ്രായപരിധി കര്‍ശനമാക്കിയാല്‍ അടുത്ത തവണ പൊളിറ്റ്ബ്യൂറോ, കേന്ദ്രകമ്മിറ്റി എന്നിവയില് മുഖ്യമന്ത്രി പിണറായി വിജയനെ ഉള്‍ക്കൊള്ളിക്കാനാവില്ല. 2021 ല്‍ പാര്‍ട്ടി കോണ്‍ഗ്രസ് നടക്കുമ്പോഴേക്കും പിണറായി 77ാം വയസ്സിലെത്തും. എന്തെങ്കിലും കാരണം കൊണ്ട് ഇളവ് നല്‍കിയാല്‍ തന്നെ അത് പ്രവര്‍ത്തകര്‍ എല്ലാവര്‍ക്കും ഒരുപോലെ ബാധകം ആക്കണം എന്നുമാണ് അംഗങ്ങള്‍ പ്രതികരിക്കുന്നത്.
