ന്യൂദല്‍ഹി: മഹാരാഷ്ട്രയില് ശിവസേനയുമായി ചേര്‍ന്ന് സര്‍ക്കാര്‍ ഉണ്ടാക്കുന്നതില്‍ മലക്കം മറിഞ്ഞ് എന്‍സിപിയും കോണ്‍ഗ്രസും. ശിവസേനയും ബിജെപിയും ഒരുമിച്ചാണ് മത്സരിച്ചത്. അതിനാല്‍ അവര്‍ അവരുടെ വഴി തെരഞ്ഞെടുക്കട്ടെയെന്നും ശരത് പവാര്‍ പറഞ്ഞു. ഈ പ്രസ്താവനയിലൂടെ സഖ്യത്തിലേര്‍പ്പെടുന്നതില്‍ നിന്നും എന്‍ സിപി അധ്യക്ഷന്‍ ശരദ് പവാര്‍ പിന്മാറിയെന്നുള്ള സൂചനകളാണ് പുറത്തുവരുന്നത്. ശിവസേനയും. കോണ്‍ഗ്രസ് അധ്യക്ഷ സോണിയ ഗാന്ധിയുമായി കൂടിക്കാഴ്‌ച്ച നടത്തുന്നതിന് മുമ്പ് മാധ്യമങ്ങളെ കാണുമ്പോഴായിരുന്നു അദേഹത്തിന്റെ ഈ പ്രസ്താവന്. ബിജെപിയും ശിവസേനയും ഒരുമിച്ചാണ് മത്സരിച്ചത്. ഞങ്ങളും കോണ്‍ഗ്രസും ഒരുമിച്ചും. അവര്‍ അവരുടെ വഴി തെരഞ്ഞെടുക്കട്ടെ, ഞങ്ങള്‍ ഞങ്ങളുടെ രാഷ്‌ട്രീയവുമായി നീങ്ങുമെന്നും പവാര്‍ പറഞ്ഞു. എന്‍സിപി കോണ്‍ഗ്രസ് സഖ്യം ശിവസേനയുമായി കൈകോര്‍ക്കില്ലെന്നാണ് ഈ പ്രസ്താവന സൂചിപ്പിക്കുന്നത്.
ഇന്ന് വൈകീട്ട് കോണ്‍ഗ്രസ് അധ്യക്ഷ സോണിയ ഗാന്ധിയെ അവരുടെ വസതിയില്‍ ചെന്ന് കാണുമെന്നും ശരദ് പവാര്‍ വ്യക്തമാക്കിയിട്ടുണ്ട്. നേരത്തെ ശിവസേനയെ സര്‍ക്കാര്‍ രൂപീകരിക്കാന്‍ ഗവര്‍ണര്‍ ക്ഷണിച്ചപ്പോളും അവസാന നിമിഷത്തിലും പിന്തുണ കത്ത് കൈമാറാന്‍ ഇരു പാര്‍ട്ടികളും തയ്യാറായിരുന്നില്ല. പിന്നീട് എന്‍സിപിയെ സര്‍ക്കാര്‍ രൂപീകരണത്തിന് ക്ഷണിച്ച ഗവര്‍ണര്‍ ഇതിനു പിന്നാലെ തന്നെ രാഷ്‌ട്രപതി ഭരണത്തിന് ശുപാര്‍ശ ചെയ്യുകയായിരുന്നു.
ഇന്നലെ എന്‍ഡിഎ യോഗത്തില്‍ പങ്കെടുക്കാത്ത ശിവസേനയ്ക്ക് പ്രതിപക്ഷത്തേക്ക് കേന്ദ്രസര്‍ക്കാര്‍ സീറ്റ് മാറ്റി നല്‍കിയിരുന്നു. പാര്‍ലമെന്റിലെ കോണ്‍ഗ്രസിനൊപ്പം അഞ്ചാംനിരയിലേക്കാണ് സീറ്റുമാറ്റി നല്‍കിയത്. ഇനിമുതല്‍ സേനാ എം.പിമാര്‍ക്കു പ്രതിപക്ഷത്തായിരിക്കും സീറ്റെന്ന് പാര്‍ലമെന്ററി കാര്യമന്ത്രി പ്രഹ്ലാദ് ജോഷി വ്യക്തമാക്കി. നാളെ പാര്‍ലമെന്റിന്റെ ശീതകാല സമ്മേളനം തുടങ്ങുന്നതിന്റെ മുന്നോടിയായാണ് സീറ്റുകള്‍ മാറ്റി നല്‍കിയത്. ശിവസേനയുടെ ഏക കേന്ദ്രമന്ത്രി അരവിന്ദ് സാവന്ത് രാജിവെച്ചതും കോണ്‍ഗ്രസും എന്‍.സി.പിയുമായും ചേര്‍ന്നു മഹാരാഷ്ട്രയില് സര്‍ക്കാരുണ്ടാക്കാന്‍ ശ്രമിക്കുന്നതും കണക്കിലെടുത്താണ് ഇതെന്നും ഇനി ചര്‍ച്ചകളില്ലെന്നും പ്രഹ്ലാദ് ജോഷി പറഞ്ഞു.
അതേസമയം, ബാല്‍താക്കറെ ജനങ്ങളെ പഠിപ്പിച്ചത് ആത്മാഭിമാനമാനമാണെന്ന് മഹാരാഷ്‌ട്ര കാവല്‍ മുഖ്യമന്ത്രി ദേവേന്ദ്ര ഫഡ്നാവിസ് പറഞ്ഞു. ശിവസേന സ്ഥാപകന്‍ ബാല്‍താക്കറെയുടെ ഏഴാം ചരമവാര്‍ഷികത്തിന്റെ അനുസ്മരണത്തിലാണ് അദേഹം ഇക്കാര്യം പറഞ്ഞത്. താക്കറെയുടെ ഒരു പഴയ പ്രസംഗ വീഡിയോ ഷെയര്‍ ചെയ്തുകൊണ്ടാണ് ഫഡ്നാവിസ് താക്കറെയ്‌ക്ക് പ്രണാമം അര്‍പ്പിച്ചുകൊണ്ട് ട്വീറ്റ് ചെയ്തത്. ആത്മാഭിമാനത്തിന്റെ പ്രാധാന്യമെന്തെന്ന് അദ്ദേഹം നമ്മെ പഠിപ്പിച്ചതായും ഫഡ്നാവിസ് ട്വീറ്റില്‍ പറയുന്നു.
ബാല്‍ താക്കറെയുടെ സമാധിസ്ഥലമായ ബുംബൈയിലെ ശിവാജി പാര്‍ക്കിലെത്തി അദ്ദേഹം ബാല്‍ താക്കറെയ്‌ക്ക് പ്രണാമമര്‍പ്പിക്കുകയും ചെയ്തു. ഉദ്ധവ് താക്കറെയും മകന്‍ ആദിത്യ താക്കറെയും വേദി വിട്ടതിനു പിന്നാലെയാണ് ഫഡ്നാവിസ് ചടങ്ങിന് എത്തിയത്. പ്രചോദനം നല്‍കുന്ന വ്യക്തിത്വമാണ് ബാല്‍ താക്കറെയെന്നും ഫഡ്നാവിസ് പറഞ്ഞു.മഹാരാഷ്ട്രയില് സര്‍ക്കാര്‍ രൂപികരിക്കാന്‍ കോണ്‍ഗ്രസ്-എന്‍സിപി-ശിവസേന നേതാക്കള്‍ ഒരുമിച്ച് കഴിഞ്ഞ ദിവസം ഗവര്‍ണറെ കാണാനുള്ള നീക്കം അവസാന നിമിഷം റദ്ദാക്കിയിരുന്നു. ഔദ്യോഗിക പ്രഖ്യാപനം നടക്കാത്തതിനാല്‍ ഉടന്‍ നീക്കം വേണ്ടെന്നാണ് തീരുമാനം. മഹാരാഷ്ട്രയില് സഖ്യം രൂപീകരിച്ചിട്ടില്ലെന്നാണ് മൂന്ന് പാര്‍ട്ടികളുടെയും ഔദ്യോഗിക നിലപാട്.
