കോഴിക്കോട്: റിമാന്ഡിലുള്ള സിപിഎംമാവോയിസ്റ്റുകളുടെ രാജ്യവിരുദ്ധ പ്രവര്ത്തനങ്ങള്ക്ക് കൂടുതല് തെളിവുകളുമായി പോലീസ്. യുഎപിഎ ചുമത്തി അറസ്റ്റ് ചെയ്ത സിപിഎം ബ്രാഞ്ച് കമ്മിറ്റി അംഗങ്ങളായ ത്വാഹ ഫസലും (24), അലന് ഷുഹൈബും(20) അനുഭാവികളല്ല ഉറച്ച മാവോയിസ്റ്റുകളാണെന്ന് ഉറപ്പിക്കുന്ന രേഖകളാണ് പോലീസിനു ലഭിച്ചത്. കനത്ത സമ്മര്ദത്തെത്തുടര്ന്ന് യുഎപിഎ പിന്വലിച്ച് കേസ് ദുര്ബലപ്പെടുത്താനുള്ള സര്ക്കാര് നീക്കത്തിനു തിരിച്ചടിയാണിത്.
ഇരുവരുടേയും ജാമ്യാപേക്ഷ യുഎപിഎ പ്രത്യേക കോടതി കൂടിയായ കോഴിക്കോട് പ്രിന്സിപ്പല് സെഷന്സ് കോടതി ഇന്ന് പരിഗണിക്കാനിരിക്കെയാണ് വ്യക്തമായ തെളിവുകള് പുറത്തു വരുന്നത്. ത്വാഹയെ അറസ്റ്റ് ചെയ്യുമ്പോഴുള്ള ദൃശ്യങ്ങളില് നിന്ന് മാവോയിസ്റ്റു ബന്ധം വ്യക്തമാണ്. ത്വാഹ വിളിക്കുന്ന മാവോയിസ്റ്റ് അനുകൂല മുദ്രാവാക്യങ്ങള് ഉറച്ച പ്രവര്ത്തകന്റേതാണെന്നു വ്യക്തം. പുസ്തകങ്ങളും ലഘുലേഖകളും പോലീസ് പിടിച്ചെടുക്കുന്നത് ദൃശ്യങ്ങളിലുണ്ട്.
പോലീസ് പരിശോധന നടക്കുമ്പോള് പുറത്തെ പോലീസ് ജീപ്പില് ഇരിക്കുന്ന ത്വാഹ ഫസല് മാവോയിസ്റ്റ് അനുകൂല മുദ്രാവാക്യം വിളിക്കുന്നതും കേള്ക്കാം. പോലീസ് പകര്ത്തിയ വീഡിയോ ആണ് ഇന്നലെ പുറത്തുവന്നത്. കഞ്ചാവു കേസില് കുടുക്കുമെന്നു പറഞ്ഞ് മുദ്രാവാക്യം വിളിപ്പിച്ചു എന്നാണ് ന്യായീകരണം. പോലീസ് ഇങ്ങനെ ഭീഷണിപ്പെടുത്തിയാല് ഉടന് സിപിഎം ബ്രാഞ്ച് കമ്മിറ്റി അംഗം മാവോയിസ്റ്റ് അനുകൂല മുദ്രാവാക്യം വിളിക്കും എന്നത് തീര്ത്തും അവിശ്വസനീയം.
ത്വാഹയുടെ വീട്ടില് നിന്ന് പ്രത്യേക കോഡിലുള്ള കത്തും കണ്ടെത്തിയെന്നാണ് സൂചന. ചില അക്ഷരങ്ങള് മാത്രമാണ് ഇതില് രേഖപ്പെടുത്തിയിരിക്കുന്നത്. എ ഫോര് പേപ്പറില് കൈകൊണ്ടെഴുതിയ കത്താണിത്. ലഘുലേഖകള്ക്കു പുറമേ ബാനറുകളും ഭൂപടവും ഇവരില് നിന്നും കണ്ടെത്തിയിരുന്നു. എന്നാല് കത്തിനെ സംബന്ധിച്ചുള്ള കൂടുതല് വിവരങ്ങള് പോലീസ് അന്വേഷിക്കുകയാണ്. മാവോയിസ്റ്റ് മാതൃകയിലുള്ള ആക്രമണ, പ്രത്യാക്രമണങ്ങള് വിവരിക്കുന്ന കുറിപ്പുകളും കണ്ടെത്തിയെന്നാണ് സൂചന.
