കോഴിക്കോട്: മാവോയിസ്റ്റ് ബന്ധത്തിന്റെ പേരില് കോഴിക്കോട് അറസ്റ്റിലായ മൂര്ക്കനാട് സ്വദേശി താഹ ഫൈസല്, തിരുവണ്ണൂര് സ്വദേശി അലന് ഷുഹൈബ് എന്നിവര്ക്ക് സിപിഎം എന്നത് മുഖംമൂടി മാത്രമായിരുന്നെന്ന് ഉറപ്പിച്ച് പോലീസ്. പരസ്യമായി മാവോയിസ്റ്റ് പ്രവര്ത്തനം സാധ്യമല്ലാത്തതിനാല് സിപിഎം ബ്രാഞ്ച് കമ്മിറ്റി അംഗങ്ങള് എന്ന നിലയില് പൊതുസമൂഹത്തില് ഇവര് സജീവമായി വിഷയങ്ങൡ ഇടപെടുകയായിരുന്നു. അലന് ശുഹൈബ് തിരുവണ്ണൂരിലും താഹ ഫസല് പാറമ്മല് ബ്രാഞ്ച് അംഗവുമാണ്. കൃത്യമായ തെളിവുകളുടെ അടിസ്ഥാനത്തിലാണ് യുവാക്കളെ അറസ്റ്റ് ചെയ്തതും യുഎപിഎ ചുമത്തിയതും. മാവോയിസ്റ്റ് ബന്ധമുള്ള പുസ്തകങ്ങളോ ലഘുലേഖകളോ കൈവശം വയ്ക്കുക മാത്രമല്ല ഇവര് ചെയ്തതെന്നാണ് പോലീസ് കണ്ടെത്തിയിരിക്കുന്നത്. മാവോയിസ്റ്റ് നേതാക്കളുമായി ഇവര് നേരിട്ട് ബന്ധപ്പെട്ടിരുന്നതിന്റെ തെളിവുകളും പോലീസ് ശേഖരിക്കുന്നുണ്ട്. മാവോയിസം കൂടാതെ കശ്മീര് ഉള്പ്പെടെ വിഷയങ്ങളില് ദേശവിരുദ്ധ നിലപാടുകളായിരുന്നു ഇവര് സ്വീകരിച്ചിരുന്നത്. സോഷ്യല് മീഡിയയില് അടക്കം അത്തരം പ്രചാരണങ്ങളും ഇവര് നടത്തിയിരുന്നു.
അതേസമയം, യുഎപിഎ ചുമത്തിയതില് പോലീസിനു മേല് സിപിഎമ്മില് നിന്നു സര്ക്കാരില് നിന്നു സമ്മര്ദം വര്ധിക്കുന്ന പശ്ചാത്തലത്തില് മാധ്യമങ്ങള് വഴി കൂടുതല് തെളിവുകള് പോലീസ് പുറത്തുവിടുകയാണ്. എന്നാല് അറസ്റ്റ് ചെയ്യുന്നതിനിടെ മാവോയിസം സിന്ദാബാദ് എന്ന് താഹ വിളിക്കുന്നതിന്റെ വീഡിയൊ പുറത്ത് വന്നിരുന്നു. പോലിസ് ചിത്രീകരിച്ച വീഡിയൊ ആണ് അറസ്റ്റിനെ എതിര്ക്കുന്നവര്ക്ക് തിരിച്ചടിയായിരുന്നു. വളരെ ആവേശത്തോടെ മാവോയിസം സിന്ദാബാദ് എന്ന് താഹ വിളിക്കുന്നതാണ് വീഡിയൊയില് ഉള്ളത്. പോലിസ് കള്ളക്കേസെടുക്കുമെന്ന് പറഞ്ഞാല് മാവോയിസ്റ്റ് അനുകൂല മുദ്രാവാക്യം മുഴക്കാന് സിപിഎം നേതാക്കളായ പ്രതികള് തയ്യാറാവുന്നതിലെ പൊരുത്തക്കേട് ചിലര് ചൂണ്ടിക്കാട്ടുന്നു. പോലീസ് ബലമായി വിളിപ്പിക്കുമ്പോള് പോലും ഇത്ര ആവേശമോ എന്നതാണ് ചിലരുടെ ചോദ്യം. ഇതിനു പിന്നാലെയാണു മാവോയിസം സംബന്ധിച്ച കൂടുതല് ബാനറുകള് താഹയുടെ വീട്ടില് നിന്നു പിടിച്ചെടുക്കന്നതിന്റേയും ദൃശ്യങ്ങള് ഇപ്പോള് പോലീസ് പുറത്തുവിട്ടിരിക്കുന്നത്.
പ്രതികളുടെ ലാപ് ടോപ് പരിശോധനയില് ചില ഞെട്ടിക്കുന്ന കണ്ടെത്തലുകള് പോലിസ് നടത്തിയെന്നും സൂചനയുണ്ട്. ഇതിന്റെ അടിസ്ഥാനത്തിലാണ് യുഎപിഎ ചുമത്തിയത് പിന്വലിക്കില്ല എന്ന നിലപാടിലേക്ക് പോലീസ് എത്തിയതെന്നാണ് വിവരം. അറസ്റ്റിനെ ന്യായീകരിച്ച് നിയമസഭയില് മുഖ്യമന്ത്രി രംഗത്തെത്തിയതും ഇതിന്റെ അടിസ്ഥാനത്തിലെന്നാണ് സൂചന. പ്രതികളെ ചോദ്യം ചെയ്തതില് നിന്നു കൂടുതല് വിവരങ്ങള് പോലീസിനു ലഭിച്ചിട്ടുണ്ട്. പ്രതികള്ക്കൊപ്പമുണ്ടായിരുന്നു മൂന്നാമന് സജീവ മാവോയിസ്റ്റാണെന്ന വിവരമാണ് പോലീസ് നല്കുന്നത്. ഇയാള്ക്കായി പോലീസ് തെരച്ചില് ശക്തമാക്കിയിട്ടുണ്ട്.
