തിരുവനന്തപുരം: പീഡനത്തിനിരയായി ദുരൂഹസാഹചര്യത്തില് മരിച്ച വാളയാറിലെ സഹോദരിമാര്ക്ക് നീതി ലഭിക്കുന്നതിന് വേണ്ടി നാളിതുവരെ വായ തുറക്കാതിരുന്ന സംവിധായകന് അടൂര് ഗോപാലകൃഷ്ണന് സിപിഎമ്മുകാര്ക്കെതിരെ യുഎപിഎ ചുമത്തിയപ്പോള് ചൊടിച്ചു. സിപിഎം പ്രവര്ത്തകരെ വിദ്യാര്ത്ഥികളെന്ന് മാത്രം അഭിസംബോധന ചെയ്ത് പ്രതികരിച്ച അടൂര്, ഇവര്ക്കെതിരെ യുഎപിഎ ചുമത്തിയ സാഹചര്യം തെറ്റാണെങ്കില് തിരുത്തണമെന്നും പറഞ്ഞു.
ഭരണകൂടം വ്യക്തികള്ക്കെതിരെ മാറരുത്. ഏത് തരത്തിലുളള പുസ്തകം വായിക്കാനും എഴുതാനും ജനങ്ങള്ക്ക് സ്വാതന്ത്ര്യമുണ്ട്. വിധ്വംസക പ്രവര്ത്തനമെന്ന് ഉറപ്പാക്കാതെ പോലീസ് യുഎപിഎ പോലുളള കേസുകള് എടുക്കരുതെന്നും അടൂര് ആവശ്യപ്പെട്ടു. തിരുവനന്തപുരത്ത് മാധ്യമങ്ങളോട് സംസാരിക്കുകയായിരുന്നു അടൂര്.
ഭരണകക്ഷിയിലെ പാര്ട്ടികളും പ്രതിപക്ഷവും, ഇപ്പോള് സാംസ്കാരിക പ്രവര്ത്തകരും യുഎപിഎ ചുമത്തിയ പോലീസ് നടപടിയ്ക്കെതിരെ കടുത്ത നിലപാടാണ് സ്വീകരിക്കുന്നത്. എന്നാല് ഇവരൊന്നും വാളയാറിലെ സഹോദരിമാരുടെ കാര്യത്തില് ഒരക്ഷരം പോലും പ്രതികരിച്ചിരുന്നില്ല.
മാധ്യമങ്ങള് ചോദിച്ചപ്പോള് മാത്രം വാളയാര് കേസില് ഉരിയാടിയ അടൂര്, സംഭവം ഉണ്ടാകാന് പാടില്ലാത്തതായിരുന്നെന്നും പറഞ്ഞു. പ്രതികള് എത്രയും പെട്ടെന്ന് ശിക്ഷിക്കപ്പെടണം. ഉത്തരേന്ത്യയിലെ ആള്ക്കൂട്ടക്കൊലയും വാളയാര് സംഭവവും താരതമ്യപ്പെടുത്തരുതെന്നും അടൂര് പറഞ്ഞു.
