ന്യൂദല്ഹി: ബിജെപി സംസ്ഥാന അധ്യക്ഷന് അഡ്വ. പിഎസ് ശ്രീധരന് പിള്ളയെ മിസോറം ഗവര്ണറായി രാഷ്ട്രപതി ഭവന് നിയമിച്ചു. രാഷ്ട്രപതി ഭവന് ഇത് സംബന്ധിച്ച വിജ്ഞാപനം പുറത്തിറക്കി. ജമ്മു കശ്മീര് ഗവര്ണര് സത്യപാല്മാലിക്ക് ഗോവ ഗവര്ണറാകും.
ജമ്മു കശ്മീരിന്റെ ലഫ്റ്റനന്റ് ഗവര്ണറായി ഗിരീഷ് ചന്ദ്ര മുര്മുവിനെയും ലഡാക്കിന്റെ ലഫ്റ്റനന്റ് ഗവര്ണറായി രാധാകൃഷ്ണ മതൂരിനെയും രാഷ്ട്രപതി നിയമിച്ചു. തന്റെ ഗവര്ണര് സ്ഥാനം പാര്ട്ടി തീരുമാനമാണെന്നും ശ്രീധരന്പിള്ള പറഞ്ഞു. ബിജെപി സംസ്ഥാന പ്രസിഡന്റ് ആയിരിക്കെ ഗവര്ണര് ആകുന്ന രണ്ടാമത്തെ നേതാവ് കൂടി ആണ് ശ്രീധരന് പിള്ള.
സജീവ രാഷ്ട്രീയത്തില് ഇല്ലാതെ തന്നെ പ്രവര്ത്തനങ്ങള് നടത്തിയ അനുഭവ സമ്പത്ത് ഉണ്ട്. പാര്ട്ടിയുടെ കേന്ദ്ര കമ്മിറ്റിയാണ് ബിജെപി സംസ്ഥാന പ്രസിഡന്റെന്ന സ്ഥാനത്ത് നിയോഗിച്ചത്. ഒന്നിലും അമിതമായി ആഹ്ളാദിക്കുകയോ വേദനിക്കുകയോ ചെയ്യുന്ന ആളല്ല. മൂല്യങ്ങള് ഉയര്ത്തിപ്പിടിച്ച് വേണം എവിടെയും പോകാനെന്ന് ശ്രീധരന് പിള്ള പറഞ്ഞു. ബിജെപി സംസ്ഥാന പ്രസിഡന്റായ ശേഷമുണ്ടായ ഏറ്റവും വലിയ വെല്ലുവിളി ശബരിമലയുമായി ബന്ധപ്പെട്ടതാണ്. എതിരാളികളോട് ജീവിതത്തില് ഇതുവരെയും ശത്രുതാപരമായി പെരുമാറിയിട്ടില്ല. കേരളത്തോട് വളരെ സാദൃശ്യമുള്ള കാലാവസ്ഥയും ആളുകളും ഭക്ഷണരീതിയിലുമെല്ലാമാണ് മിസോറാമിലേതെന്നും അദ്ദേഹം പറഞ്ഞു.
രാഷ്ട്രപതി രാം നാഥ് കോവിന്ദാണ് ബിജെപി സംസ്ഥാന പ്രസിഡന്റ് പി എസ് ശ്രീധരന് പിള്ളയെ മിസോറാം ഗവര്ണറായി നിയമിച്ചുകൊണ്ടുള്ള ഉത്തരവ് പുറത്തിറക്കിയത്. സംസ്ഥാന അധ്യക്ഷന്റെ കാലാവധി അടുത്ത മാസം തീരാനിരിക്കെ ആണ് അദ്ദേഹത്തെ ഗവര്ണറായി നിയമിച്ചിരിക്കുന്നത്. മിസോറാമിന്റെ ഗവര്ണര് പദവിയിലെത്തുന്ന മൂന്നാമത്തെ മലയാളിയാണ് ശ്രീധരന് പിള്ള.
