ന്യൂദല്ഹി: മരട് ഫ്ലാറ്റ് പൊളിക്കലുമായി ബന്ധപ്പെട്ട ഹര്ജിയില് വീണ്ടും കര്ശന നിലപാടുമായി സുപ്രീം കോടതി. ഫ്ലാറ്റ് പൊളിക്കാനാണ് കോടതി ഉത്തരവിട്ടതെന്നും അതു കര്ശനമായി നടപ്പാക്കുമെന്നും ജസ്റ്റിസ് അരുണ് മിശ്ര. ഉത്തരവില് നിന്നു കോടതി പിന്മാറുകയെന്നല്ല ഉത്തരവില് നിന്ന് ഒരുവരി പോലും മാറ്റിയെഴുതില്ല. ഫ്ലാറ്റ് ഉടമകള്ക്കെല്ലാം 25 ലക്ഷം രൂപ നല്കണം. ഫ്ലാറ്റ് നിര്മാതാക്കാള് 20 കോടി രൂപ കെട്ടിവയ്ക്കാനും നിര്മാതാക്കളുടെ ബാങ്ക് അക്കൗണ്ടുകളുടെ വിവരങ്ങള് കൈമാറാനും കോടതി നിര്ദേശിച്ചു. ഫ്ലാറ്റ് നിര്മാതാക്കളുടെ സംഘടന നല്കിയ ഹര്ജി തള്ളിയതിനൊപ്പം കോടതിയുടെ സമയം പാഴാക്കരുതെന്ന താക്കീതും ഹര്ജിക്കാര്ക്ക് അരുണ് മിശ്ര നല്കി.
ഫ്ലാറ്റ് പൊളിക്കാന് സ്വീകരിച്ച നടപടികള് വ്യക്തമാക്കി ചീഫ് സെക്രട്ടറി ടോം ജോസ് ഇന്നലെ സത്യവാങ്മൂലം സമര്പ്പിച്ചിരുന്നു. ഇത് ഇന്ന് പരിഗണിക്കവേയാണു ഇതിനൊപ്പം ഫ്ലാറ്റ് നിര്മാതാക്കള് നല്കിയ ഹര്ജിയും കോടതി പരിശോധിച്ചത്. മരടില് തീരദേശ നിയമം ലംഘിച്ച് നിര്മിച്ച ഫ്ലാറ്റ് സമുച്ചയങ്ങള് പൊളിച്ചുനീക്കുന്നതുമായി ബന്ധപ്പെട്ട നടപടികളുടെ പുരോഗതി സുപ്രീം കോടതി പരിശോധിച്ചു. ആറ് പേജുള്ള സത്യവാങ്മൂലമാണ് ചീഫ് സെക്രട്ടറി ടോം ജോസ് സമര്പ്പിച്ചത്. സുപ്രിം കോടതിയുടെ നിര്ദേശങ്ങള് അതിന്റെ ഗൗരവത്തോടെ തന്നെ നടപ്പാക്കുന്നുവെന്ന് വ്യക്തമാക്കുന്നതാണ് സത്യവാങ്മൂലം. ഫ്ലാറ്റ് ഉടമകള്ക്ക് ഇതുവരെ പത്തുകോടി എണ്പത്തിയേഴ് ലക്ഷം രൂപ നഷ്ടപരിഹാരം കൈമാറി. ബാക്കിയുള്ളവര്ക്ക് ബാങ്ക് വിവരങ്ങള് കൈമാറുന്ന മുറക്ക് തുക നല്കും. കെട്ടിടങ്ങള് പൊളിക്കാന് തുടങ്ങി. ടെന്ഡര് അടക്കം നടപടികളുടെ രേഖകളും ചീഫ് സെക്രട്ടറി കോടതിയ്ക്ക് നല്കി. ക്രൈംബ്രാഞ്ച് അന്വേഷണം സംബന്ധിച്ച വിവരങ്ങളും കൈമാറി.
