തിരുവനന്തപുരം: വട്ടിയൂര്ക്കാവില് വിജയിച്ച വി.കെ പ്രശാന്തിനെയും മുഖ്യമന്ത്രിയെയും അഭിനന്ദിച്ച് ഫേസ്ബുക്കില് തുഷാര് വെള്ളാപ്പള്ളി ഇട്ട പോസ്റ്റ് ഏറെ വിവാദമായിരുന്നു. എന്നാല്, പോസ്റ്റ് തുഷാര് വെള്ളാപ്പള്ളി നേരിട്ട് ഇട്ടതല്ലെന്നും പേജ് കൈകാര്യം ചെയ്തിരുന്ന വ്യക്തി ചെയ്തതാണെ്നും പിന്നീട് വിശദീകരണം ഉണ്ടായി. അത്തരമൊരു സന്ദേശമിട്ടത് ഫെയ്സ്ബുക്ക് നോക്കാന് ചുമതലപ്പെടുത്തിയ വ്യക്തിയാണെന്നും ഇതില് ഖേദിക്കുന്നുവെന്നും തുഷാറും വ്യക്തമാക്കി. സംഭവം വിവാദമായതോടെ തുഷാര് വെള്ളാപ്പള്ളിയുടെ ഫേസ്ബുക്ക് പേജ് കൈകാര്യം ചെയ്തിരുന്ന കിരണ് ചന്ദ്രനെ ബിഡിജെഎസില് നിന്ന് പുറത്താക്കി. ഇന്നു ചേര്ന്ന ബിഡിജെഎസിന്റെ സംസ്ഥാന കൗണ്സിലിന്റേതാണ് തീരുമാനം.
ബിഡിജെഎസിന്റെ പത്രക്കുറിപ്പിന്റെ പൂര്ണരൂപം- കേരള നിയമസഭ ഉപതെരഞ്ഞെടുപ്പുമായി ബന്ധപ്പെട്ട് പാര്ട്ടി അധ്യക്ഷനും, പാര്ട്ടിക്കും അവമതിപ്പുണ്ടാക്കുന്ന രീതിയില് പാര്ട്ടി അധ്യക്ഷന് തുഷാര് വെള്ളാപ്പള്ളിയുടെ ഫേസ്ബുക് പേജില് അലസമായ രീതിയില്, തെറ്റായ സന്ദേശം നല്കുന്ന കുറിപ്പിട്ട, അദ്ദേഹത്തിന്റെ പേജ് കൈകാര്യം ചെയ്തിരുന്നകിരണ് ചന്ദ്രനെ പാര്ട്ടിയുടെ ഔദ്യോഗിക സ്ഥാനത്തു നിന്നും, പ്രാഥമിക അംഗത്വത്തില് നിന്നും പുറത്താക്കിയതായി സംസ്ഥാന കൗണ്സിലിന് വേണ്ടി ജനറല് സെക്രട്ടറി ടി. വി. ബാബു അറിയിച്ചു.
കിരണ് ചന്ദ്രന് ചെയ്ത പ്രവൃത്തി പാര്ട്ടി നിലപാടിനും, കാഴ്ചപ്പാടുകള്ക്കും വിരുദ്ധവും, തന്മൂലം പാര്ട്ടി വിരുദ്ധതയും ആണെന്ന് സംസ്ഥാന കൗണ്സില് വിലയിരുത്തി. അതുകൊണ്ട് തന്നെ ഇതിനെ വളരെ ഗൗരവപരമായ തെറ്റായി കണ്ടുകൊണ്ടാണ് സംസ്ഥാന കൗണ്സില് അടിയന്തിരമായി കൂടി ഈ അച്ചടക്ക നടപടി കൈക്കൊണ്ടതെന്നും ടി. വി. ബാബു അറിയിച്ചു. അതേസമം, എന്ഡിഎ മുന്നണിയുടെ അവിഭാജ്യഘടകമാണ് ബിഡിജെഎസ് എന്നും ഇതില് മാറ്റമുണ്ടായിട്ടില്ലെന്നും തുഷാര് ഫേസ്ബുക്കില് കുറിച്ചിരുന്നു. കോന്നിയിലുള്പ്പെടെ എന്ഡിഎയ്ക്കുണ്ടായ വോട്ട് ശുഭസൂചനയാണെന്നും വരും തിരഞ്ഞെടുപ്പുകളില് കഷ്ടപ്പാടിനുള്ള ഫലം കിട്ടുമന്നും തുഷാര് ഫെയ്സ്ബുക്കില് വ്യക്തമാക്കിയിരുന്നു.
