കോഴിക്കോട്: കോഴിക്കോട് നഗരത്തിലെ കണ്ണായ സ്ഥലത്ത് ഭൂമി തുച്ഛ വിലയ്ക്ക് ഗുരുവായൂര് ദേവസ്വം ലേലം ചെയ്തു. പങ്കെടുത്തത് ഒരാള് മാത്രം. ലേലത്തില് പ്രതിഷേധിച്ച് ഹിന്ദു ഐക്യവേദി. വെസ്റ്റ്ഹില് പിഡബ്ല്യുഡി ഗസ്റ്റ് ഹൗസിന് സമീപത്തെ 3.27 സെന്റ് സ്ഥലവും ഇരുനിലകെട്ടിടവുമാണ് ഗുരുവായൂര് ദേവസ്വം പതിനഞ്ച് ലക്ഷത്തി അയ്യായിരം രൂപയ്ക്ക് ലേലം ചെയ്തത്. 2008 ല് പി. ഹരിദാസന് ഗുരുവായൂരപ്പന് സമര്പ്പിച്ച വീടും സ്ഥലവുമാണ് ലേലം ചെയ്തത്.
ഗുരുവായൂര് ദേവസ്വം ഭൂമി അന്യാധീനപ്പെടുത്തുന്നതിനെതിരെ ഹിന്ദു ഐക്യവേദിയുടെ നേതൃത്വത്തില് ലേല സ്ഥലത്ത് ഭക്തജനങ്ങള് പ്രതിഷേധിച്ചു. പ്രതിഷേധം വകവയ്ക്കാതെ ദേവസ്വം ഡെപ്യൂട്ടി അഡ്മിനിസ്ട്രേറ്റര് കെ.ആര്. സുനില്കുമാറിന്റെ നേതൃത്വത്തിലെത്തിയ സംഘമാണ് നടപടികള്ക്ക് നേതൃത്വം നല്കി. സ്വത്ത് സംബന്ധിച്ച് ഹൈക്കോടതിയില് കേസ് നിലവിലുണ്ട്. ലേലത്തിന് കോടതിയുടെ അംഗീകാരമുണ്ട്. 11 ലക്ഷം രൂപയില് കൂടുതല് ലഭിച്ച ലേലം ഉറപ്പിക്കാമെന്ന് കോടതിയുടെ നിര്ദ്ദേശമെന്നും അദ്ദേഹം പറഞ്ഞു.
ദേവസ്വത്തിന് സമര്പ്പിച്ച സ്വത്ത് ലേലം ചെയ്യുന്നത് 1978 ലെ ഗുരുവായൂര് ദേവസ്വം നിയമത്തിന് എതിരാണ്. കര്ശനമായ ഉപാധികളാണ് ദേവസ്വം സ്വത്ത് കൈമാറുന്നതിനുള്ളത്. ഇതു മുഴുവന് ലംഘിച്ചാണ് ലേലം. തൊട്ടടുത്ത വീട്ടുകാരന് കെ. ദിനേശ്കുമാറാണ് ഭൂമി ലേലത്തിലെടുത്തത്. ലേല നടപടികള് രഹസ്യമായി വച്ചതിന്റെ തെളിവാണ് ലേലത്തില് ഒരാള് മാത്രം പങ്കെടുത്തത് വ്യക്തമാക്കുന്നതെന്ന് ഹിന്ദു ഐക്യവേദി നേതാക്കള് പറഞ്ഞു. ലേലം അസ്ഥിരപ്പെടുത്താന് നിയമ നടപടികളുമായി മുന്നോട്ട് പോകുമെന്നും അവര് അറിയിച്ചു. മഹിളാ ഐക്യവേദി സംസ്ഥാന വൈസ് പ്രസിഡന്റ് സി.എസ്. സത്യഭാമ, ഹിന്ദു ഐക്യവേദി ജില്ലാ പ്രസിഡന്റ് ദാമോദരന് കുന്നത്ത്, ജില്ലാ ജനറല് സെക്രട്ടറി വി.പി. ജോഷി ചന്ദ്രന്, സുഭീഷ് ഇല്ലത്ത്, വിനോദ് നമ്പൂതിരി, ലാലു മാനാരി എന്നിവര് നേതൃത്വം നല്കി.
