തിരുവനന്തപുരം: പതിനെട്ട് വര്ഷമായി ശ്രീപത്മനാഭസ്വാമിക്ക് നല്കാനുള്ള പണം തമിഴ്നാട് സര്ക്കാര് കുടിശ്ശിക സഹിതം നല്കി. ശ്രീപദ്മനാഭസ്വാമി ക്ഷേത്രത്തിന് കന്യാകുമാരി ജില്ലയിലുണ്ടായിരുന്ന ഭൂമി സംസ്ഥാന വിഭജനത്തെത്തുടര്ന്ന് തമിഴ്നാട് സര്ക്കാര് ഏറ്റെടുത്തിരുന്നു. നഷ്ടപരിഹാരമായി തമിഴ്നാട് സര്ക്കാര് നല്കിയിരുന്ന അലവന്സാണ് കുടിശിക സഹിതം 1.67 കോടി രൂപയാണ് അനുവദിച്ചത്.
പണ്ടാരഭൂമിക്ക് നല്കിവന്നിരുന്ന നഷ്ടപരിഹാരം 2000 മുതല് മുടങ്ങിയിരുന്നു. ഇത് ആവശ്യപ്പെട്ട് പത്മനാഭസ്വാമിക്ഷേത്ര അധികാരികള് തമിഴ്നാട് സര്ക്കാരിന് നല്കിയ കത്തിന്റെ അടിസ്ഥാനത്തിലാണ് നടപടി. തിരുവിതാംകൂര് രാജകുടുംബാംഗം ആദിത്യവര്മ്മയും ശ്രീ പത്മനാഭസ്വാമി ക്ഷേത്രം എക്സിക്യൂട്ടീവ് ഓഫീസര് എസ്. രതീശനുമാണ് ഇക്കാര്യത്തില് സജീവമായി ഇടപെട്ടത്. 2013 ന് മുമ്പുവരെ ഈ അലവന്സ് തഹസീര്ദാര് വഴിയാണ് വിതരണം ചെയ്തിരുന്നത്. ലാന്ഡ് ഭരണവകുപ്പിന്റെ ബജറ്റ് വിഹിതത്തില് നിന്നാണ് ഇത് കണ്ടെത്തിയിരുന്നതും.
ഭൂമി കൈവശം വച്ച് അനുഭവിക്കുന്നതിന് തമിഴ്നാട് സര്ക്കാര് നഷ്ടപരിഹാരം നല്കിയിരുന്നു. തഹസീല്ദാര് മുഖാന്തിരമാണ് ഇത് നല്കിവന്നിരുന്നത്. എന്നാല് പിന്നീട് ഇത് ബജറ്റ് മുഖാന്തിരമാക്കി മാറ്റിയിരുന്നു. ഇതോടെ ബന്ധപ്പെട്ട വകുപ്പുകള് ബജറ്റ് വിഹിതത്തില് നിന്നും ഈ തുക നല്കണമെന്ന വ്യവസ്ഥ കൊണ്ടുവന്നിരുന്നു. കാലതാമസം ഒഴിവാക്കനായി ഹിന്ദു റിലിജിയസ് ആന്റ് ചാരിറ്റബിള് എന്ഡോവ്മെന്റ് വകുപ്പുവഴിയാണ് ഇത് വിതരണം ചെയ്തിരുന്നത്. അടുത്തിടെ തമിഴ്നാട് അഡീഷണല് ചീഫ് സെക്രട്ടറിയുടെ നേതൃത്വത്തില് നടന്ന യോഗത്തില് പത്മനാഭസ്വാമി ക്ഷേത്രത്തിലെ എക്സിക്യൂട്ടീവ് ഓഫീസര് പങ്കെടുത്തിരുന്നു. ആ യോഗത്തില് പത്മനാഭക്ഷേത്രവക ഭൂമികള്ക്ക് 2000 മുതല് ലഭിക്കേണ്ടയിരുന്ന അലവന്സുകളുടെ വിശദമായ കണക്ക് എക്സിക്യൂട്ടീവ് ഓഫീസര് അവതരിപ്പിക്കുകയും ചെയ്തിരുന്നു.
കണക്ക് പ്രകാരം 1.67 കോടി രൂപയാണ് പത്മനാഭസ്വാമി ക്ഷേത്രത്തിന് ലഭിക്കാനുണ്ടായിരുന്നത്. യോഗത്തില് സംബന്ധിച്ചിരുന്ന കന്യാകുമാരി ജില്ലയിലെ അഡീഷണല് പേര്സണല് അസിസ്റ്റന്റിനോട് ഇതേക്കുറിച്ച് അന്വേഷിച്ച് റിപ്പോര്ട്ട് സമര്പ്പിക്കാന് ആവശ്യപ്പെട്ടിരുന്നു. കന്യാകുമാരി ജില്ലയിലെ റവന്യു ഓഫീസര് ഇത് അംഗീകരിക്കുകയും ചെയ്തു. തമിഴ്നാട് സര്ക്കാര് പുറത്തിറക്കിയ ഉത്തരവ് പ്രകാരം ശ്രീ പത്മനാഭസ്വാമി ക്ഷേത്രം ഹിന്ദു റിലിജിയസ് ആന്റ് ചാരിറ്റബിള് എന്ഡോവ്മെന്റ് വകുപ്പിന് കീഴില് വരില്ലെന്നും ഉദ്യോഗസ്ഥര് ചൂണ്ടിക്കാട്ടിയിരുന്നു. റിപ്പോര്ട്ട് വിശദമായി പരിശോധിച്ചശേഷം തമിഴ്നാട് സര്ക്കാര് 2001 മുതല് 2019 വരെയുള്ള അലവന്സായി തുക അനുവദിക്കുകയായിരുന്നു.
