തേഞ്ഞിപ്പാലം : എംജി സര്‍വകലാശാലയില്‍ മന്ത്രി കെ.ടി. ജലിലീന്റെ ഇടപെടലില്‍ തോറ്റ വിദ്യാര്‍ത്ഥിയെ വിജയിപ്പിച്ച സംഭവത്തില്‍ പരാതികള്‍ ലഭിച്ചിട്ടുണ്ടെന്ന് ഗവര്‍ണര്‍ ആരിഫ് മുഹമ്മദ് ഖാന്‍. ഇത് സംബന്ധിച്ച് പരിശോധിച്ചു വരികയാണെന്നും ഗവര്‍ണര്‍ പറഞ്ഞു. കാലിക്കറ്റ് സര്‍വകലാശാലയിലെ ലൈഫ് സയന്‍സ് പഠന വകുപ്പ്, ആനിമല്‍ ഹൗസ് കെട്ടിടങ്ങള്‍ എന്നിവ ഉദ്ഘാടനം ചെയ്യാനെത്തിയതപ്പോഴാണ് ഇക്കാര്യം വ്യക്തമാക്കിയത്.
അതേസമയം വിഷയത്തില്‍ ഗവര്‍ണര്‍ ഏത് നിലപാടെടുക്കുമെന്നതില്‍ സിപിഎമ്മിനും സര്‍ക്കാരിനും ആശങ്കയുണ്ട്. വിഷയം തെരഞ്ഞെടുപ്പ് പ്രചരണ വിഷയത്തിനുപരി സജീവ ചര്‍ച്ചയാവുന്നതാണ് സര്‍ക്കാരിനെയും മന്ത്രിയേയും അസ്വസ്ഥമാക്കുന്നത്. ഇതോടൊപ്പം ഉമ്മന്‍ ചാണ്ടി സര്‍കകാരിന്റെ കാലത്തും ഇത്തരത്തില്‍ മാര്‍ക്ക് ദാനങ്ങള്‍ ഉണ്ടായിട്ടുള്ളതായി കണ്ടെത്തിയിട്ടുണ്ട്. തിങ്കളാഴ്ച വോട്ടെടുപ്പ് നടക്കാനിരിക്കേ് യുഡിഎഫിന് ഇതും തിരിച്ചടിയാകുന്നുണ്ട്.
കൂടാതെ കോന്നിയിലെ സ്ഥാനാര്‍ത്ഥിയും ഡിവൈഎഫ്‌ഐ നേതാവുമായ ജനീഷ് എംജി സര്‍വ്വകലാശാല പരീക്ഷയില്‍ തട്ടിപ്പ് നടത്തിയതായും ആരോപണങ്ങള്‍ പുറത്തുവന്നിട്ടുണ്ട്. ബിഎ എക്‌ണോമിക്‌സിന് പഠിക്കവേയാണ് പരീക്ഷാ തട്ടിപ്പ് നടത്തിയത്. അതിന് ജനീഷിനെ ഡീബാര്‍ ചെയ്യുകയും ഉണ്ടായി. കൂടാതെ സ്ത്രീവിരുദ്ധ പരാമര്‍ശങ്ങള്‍ നടത്തിയതിന് ഇയാള്‍ക്കെതിരെ കേസും രജിസ്റ്റര്‍ ചെയ്തിട്ടുണ്ട്. അതിനോടൊപ്പം ശബരിമല വിഷയത്തില്‍ ഇടതു പക്ഷത്തിന്റെ പ്രതിച്ഛായ തകര്‍ന്നതും ഉപതെരഞ്ഞെടുപ്പിലും ജനങ്ങള്‍ വിഷയമാക്കുമോയെന്നാണ് നേതാക്കള്‍ ഭയപ്പെടുന്നത്.
ഇതിനിടെ കുടുംബാംഗങ്ങള്‍ക്കെതിരെ ആരോപണം ഉന്നയിക്കുന്നതു ശരിയല്ലെന്ന സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ വ്യക്തമാക്കിയതിനു ശേഷവും പ്രതിപക്ഷനേതാവ് രമേശ് ചെന്നിത്തലയുടെ മകനെ ലക്ഷ്യമിട്ടുള്ള ആരോപണത്തില്‍ ഉറച്ച് മന്ത്രി കെ.ടി.ജലീല്‍ നില്‍ക്കുന്നതും സിപിഎമ്മില്‍ ആശങ്ക പടര്‍ത്തുന്നുണ്ട്. കുടുംബാംഗങ്ങളെ വിവാദത്തിലേക്കു വലിച്ചിഴക്കുന്നതു ശരിയല്ലെന്നും അത് യുഡിഎഫിന്റെ രീതിയാണെന്നുമുള്ള കോടിയേരിയുടെ പരാമര്‍ശം ചൂണ്ടിക്കാട്ടിയപ്പോഴാണു ജലീല്‍ ആരോപണത്തില്‍ ഉറച്ചു നില്‍ക്കുന്നതായി വ്യക്തമാക്കിയത്.
ചെന്നിത്തലയ്‌ക്കെതിരെ പ്രത്യാരോപണമല്ല, വസ്തുതയാണ് താന്‍ ഉന്നയിച്ചത്. തന്റെ ഭാര്യയുടെ നിയമനവുമായി ബന്ധപ്പെട്ടു മാധ്യമങ്ങള്‍ തന്റെ അടുക്കളയില്‍ വരെ എത്തി. രമേശ് ചെന്നിത്തലയുടെ അടുക്കള വരെയൊന്നും പോകേണ്ട. വീടിന്റെ മുന്‍വശം വരെയെങ്കിലും പോകണം. ഉന്നതവിദ്യാഭ്യാസ കൗണ്‍സില്‍ വൈസ് ചെയര്‍മാന്‍ ഡോ. രാജന്‍ ഗുരുക്കളുടെ അഭിപ്രായം ശരിവയ്‌ക്കുന്നു. സര്‍വകലാശാലയുടെ ദൈനംദിന കാര്യങ്ങളില്‍ മന്ത്രി ഇടപെടുന്നതു ശരിയല്ല. താന്‍ ഇടപെട്ടിട്ടില്ലെന്നും ജലീല്‍ പറഞ്ഞു.
