പാലാ: ജനറല്‍ ആശുപത്രിയില്‍ രോഗികള്‍ക്കും കൂടെയുള്ളവര്‍ക്കും ഇനി സേവാഭാരതിയുടെ സൗജന്യ പ്രഭാത ഭക്ഷണം. സേവാഭാരതി ട്രസ്റ്റായ മാനവ സേവാ ചാരിറ്റി ഓറിയന്റഡ് ട്രസ്റ്റിന്റെ നേതൃത്വത്തിലാണ് ‘സേവാമൃതം പദ്ധതി ‘ ആരംഭിക്കുന്നതെന്ന് നേതാക്കളായ ഡോ.എന്‍. കെ. മഹാദേവന്‍ , കെ.എന്‍. വാസുദേവന്‍, വി. മുരളീധരന്‍, ബിജു കൊല്ലപ്പിള്ളി, അഡ്വ. ഡി. പ്രസാദ് എന്നിവര്‍ പറഞ്ഞു. പദ്ധതിക്ക് വന്‍ സ്വീകരണമാണ് നാട്ടുകാരുടെ ഭാഗത്തുനിന്നും ലഭിച്ചിരിക്കുന്നത്. ഒക്ടോബര്‍ 25 മുതലാകും പദ്ധതി നടപ്പില്‍ വരുക.
200ല്‍പ്പരം കിടപ്പു രോഗികളാണ് പാലാ ജനറല്‍ ആശുപത്രിയിലുള്ളത്. ഏകദേശം അത്ര തന്നെ കൂട്ടിരിപ്പുകാരുമുണ്ട്. ഇവര്‍ക്കായി ദിവസവും ഇഡ്ഡലിയും ചട്‌നിയും തയ്യാറാക്കാന്‍ കുറഞ്ഞത് നാലായിരം രൂപയെങ്കിലും പ്രതിദിനം വേണ്ടിവരുമെന്നും ഉദാരമതികളായ വ്യക്തികളില്‍ നിന്നാണ് ഇതിനുള്ള തുക കണ്ടെത്തുന്നതെന്നും സേവാമൃതം കണ്‍വീനര്‍ ബിജു കൊല്ലപ്പിള്ളി പറഞ്ഞു. കൂടാതെ ഇതിനോടകം മൂന്നു മാസത്തേക്കാവശ്യമായ ഭക്ഷണം വിതരണം ചെയ്യാനുള്ള തുക സമാഹരിച്ചിട്ടുണ്ടെന്നും അദ്ദേഹം പറഞ്ഞു. പദ്ധതിയെക്കുറിച്ച് കേട്ടറിഞ്ഞ വിദേശ മലയാളികള്‍ ഉള്‍പ്പെടെയുള്ളവര്‍ സഹായ വാഗ്ദാനം ചെയ്തിട്ടുണ്ട്. ജന്മദിനങ്ങളിലും പൂര്‍വികരുടെ പാവന സ്മരണയ്‌ക്കായും മറ്റു വിശേഷദിനങ്ങളിലും സേവാമൃതത്തില്‍ പങ്കാളിയാകാന്‍ നിരവധി പേര്‍ മുന്നോട്ടു വരുന്നുണ്ട്. അവര്‍ക്ക് ഭക്ഷണം നേരിട്ട് വിളമ്പാനുള്ള സൗകര്യവുമുണ്ട്. പാവപ്പെട്ട രോഗികള്‍ക്ക് ദിവസവും രാവിലെ തികച്ചും സൗജന്യമായി ഭക്ഷണം നല്‍കുന്ന പദ്ധതിക്ക് വേണ്ട എല്ലാ സൗകര്യങ്ങളും നഗരസഭ ഒരുക്കിക്കൊടുക്കുമെന്ന് നഗരസഭാ ചെയര്‍ പേഴ്‌സണ്‍ ബിജി ജോജോ പറഞ്ഞു. സേവാ ഭാരതിയുടേത് മാതൃകാ പരമായ നടപടിയെന്ന് ജനറല്‍ ആശുപത്രി സൂപ്രണ്ട് ഡോ. അഞ്ജു സി മാത്യു പറഞ്ഞു.
പദ്ധതി അരുണാപുരം സണ്‍ സ്റ്റാര്‍ കണ്‍വെന്‍ഷന്‍ സെന്ററില്‍ മുന്‍ ഡിജിപി ഡോ. ടിപി സെന്‍ കുമാര്‍ 24ാം തിയതി വൈകിട്ട് 5.30 ന് ഉദ്ഘാടനം ചെയ്യും. കെ.എന്‍. വാസുദേവന്‍ അദ്ധ്യക്ഷത വഹിക്കും. സേവാഭാരതി സംസ്ഥാന സംഘടനാ സെക്രട്ടറി യുഎന്‍ ഹരിദാസ് മുഖ്യ പ്രഭാഷണം നടത്തും. ജനറല്‍ ആശുപത്രി സൂപ്രണ്ട് ഡോ.അഞ്ജു സി. മാത്യു പ്രഭാത ഭക്ഷണ വിതരണത്തിന്റെ അനുമതിപത്രം സേവാഭാരതിക്ക് കൈമാറും. മുനിസിപ്പല്‍ ചെയര്‍പേഴ്‌സണ്‍ ബിജി ജോജോ മുഖ്യാതിഥിയായിരിക്കും. വി.മുരളീധരന്‍, ഡോ. എന്‍.കെ. മഹാദേവന്‍, ബിജു കൊല്ലപ്പിള്ളി, അഡ്വ.ഡി.പ്രസാദ് തുടങ്ങിയവര്‍ പ്രസംഗിക്കും.
