തിരുവനന്തപുരം : ഗുരുതര കുറ്റകൃത്യങ്ങളില് സംസ്ഥാനത്തെ പോലീസില് ചിലര്ക്ക് പങ്കാളിത്തം ഉള്ളതായി കണ്ടെത്തല്. ഡിജിപി നിയോഗിച്ച കമ്മിറ്റി 59 പോലീസുകാര്ക്ക് കുറ്റകൃത്യങ്ങളില് പങ്കുണ്ടെന്ന് കണ്ടെത്തിയിരിക്കുന്നത്. പോലീസുകാരില് പലര്ക്കും ഗുരുതര കുറ്റകൃത്യങ്ങളില് പങ്കാളിത്തം ഉള്ളതായി റിപ്പോര്ട്ടുകള് പുറത്തുവന്നതിനെ തുടര്ന്നാണ് പ്രത്യേക സമിതിയെ അന്വേഷണത്തിന് നിയോഗിച്ചത്.
എറണാകുളം റൂറലിലാണ് ഗുരുതര കുറ്റകൃത്യങ്ങള് ചെയ്ത പോലീസുകാര് ഏറ്റവും കൂടുതലുള്ളത്, 13 പേര്. തിരുവനന്തപുരം(എട്ട്), കോട്ടയം(മൂന്ന്) എന്നീ ജില്ലകള് രണ്ടും മൂന്നും സ്ഥാനത്താണ്.
ഡിവൈഎസ്പി-1, സിഐ-1, എസ്ഐ-5, എഎസ്ഐ-7, സീനിയര് സിപിഒ-8, സിപിഒ-30, ഡ്രൈവര്- 4, ജൂനിയര് സൂപ്രണ്ട്- 1, പാര്ടൈം സ്വീപ്പര് – 2 എന്നിങ്ങനെയാണ് ഗുരുതര കുറ്റകൃത്യങ്ങളില് ഏര്പ്പെട്ട പോലീസുകാരുട കണക്കുകള്. അതേസമയം ഗുരുതര കുറ്റകൃത്യങ്ങളില് പങ്കാളികളായിട്ടും സര്വീസില് തുടരുന്നവര്ക്കെതിരെ ഇതുവരെ നിയമ നടപടികള് ഒന്നും ഉണ്ടായിട്ടില്ല.
കേരള പോലീസ് ആക്ടിലെ സെക്ഷന് 86 അനുസരിച്ച് കുറ്റകൃത്യങ്ങളില് പങ്കുണ്ടെന്നു തെളിഞ്ഞാല് കര്ശ്ശന നടപടി സ്വീകരിക്കണമെന്ന് 2018 ഏപ്രില് 12നു മനുഷ്യാവകാശ കമ്മിഷന് നിര്ദ്ദേശിച്ചിരുന്നെങ്കിലും നടപടിയുണ്ടായില്ല. എന്നാല് 59 കേസുകളിലും അന്വേഷണമോ വിചാരണയോ നടക്കുന്ന സാഹചര്യത്തില് നടപടി സ്വീകരിക്കാനാകില്ലെന്നാണ് അധികൃതര് ഇപ്പോള് വാദിക്കുന്നത്.
2017 ലെ കണക്കനുസരിച്ച് വിവിധ തസ്തികകളിലുള്ള 387 പോലീസുകാരായിരുന്നു ക്രിമിനല് നടപടികള് നേരിട്ടിരുന്നത്. ഇത്തരം കേസുകളെക്കുറിച്ച് വിശദമായി പഠിക്കാന് 2018 ഏപ്രില് 24 നാണ് ക്രൈംബ്രാഞ്ച് ഡിജിപിയുടെ നേതൃത്വത്തില് കമ്മറ്റി രൂപീകരിച്ചത്. ഇന്റലിജന്സ് ഐജി, സായുധ പോലീസ് ഡിഐജി, സെക്യൂരിട്ടി എസ്പി, എന്ആര്ഐ സെല് എസ്പി എന്നിവരായിരുന്നു മറ്റ് അംഗങ്ങള്. മൂന്നു മാസത്തിനകം റിപ്പോര്ട്ട് സമര്പ്പിക്കണമെന്നും ശിക്ഷ ലഭിച്ചശേഷവും ചില ഉദ്യോഗസ്ഥര് സര്വീസില് തുടരുന്നത് അമ്പരപ്പിക്കുന്നതാണെന്നും ഡിജിപി ഉത്തരവില് വ്യക്തമാക്കിയിരുന്നു.
പട്ടികയില് ഉള്പ്പെട്ട ഡിവൈഎസ്പി കൊല്ലം സിബിസിഐഡിയിലും സിഐ എറണാകുളം റൂറലിലുമാണ് സേവനമനുഷ്ടിക്കുന്നത്. എസ്ഐമാരില് രണ്ടുപേര് ആലപ്പുഴയിലും എറണാകുളം റൂറല്, തൃശൂര്, കോട്ടയം എന്നിവിടങ്ങളില് ഓരോരുത്തര് വീതവും പ്രവര്ത്തിക്കുന്നു. എഎസ്ഐമാരില് മൂന്നുപേരുടെ തട്ടകം കോട്ടയമാണ്. മറ്റു രണ്ടുപേര് എറണാകുളം റൂറലിലും ഇടുക്കിയിലും കൊച്ചി സിറ്റിയിലും ഓരോരുത്തര് വീതവും സേവനം ചെയ്യുന്നു. സീനിയല് സിപിഒമാരില് ഓരോ ആളുകള് വീതം തിരുവനന്തപുരം സിറ്റി, കൊല്ലം സിറ്റി, എറണാകുളം റൂറല്, കാസര്ഗോഡ്, കെഎപി 1, കെഎപി 3, എസ്എപി, പോലീസ് അക്കാദമി എന്നിവിടങ്ങളില് ജോലി ചെയ്യുന്നവരാണ്.
